懶懶閒遊玩記: 長野遊(二) 野猿公苑 & 雲場池

這天的行程主要是去地獄谷野猿公苑，顧名思義就喺去睇馬騮，要睇馬騮，喺城門同金山郊野公園都有得睇，仲要有隨時被搶野食既風險，點解要山長水遠睇馬騮，就喺哩度D馬騮會浸溫泉，之前睇相覺得好得意，所以今次特登去睇下。

去野猿公苑一般都喺由長野出發，直接坐巴士喺上林溫泉落車，又或者坐電車去湯田中溫泉再轉巴士。不過今年加開一條新既路線，可以由飯山驛坐巴士到上林溫泉，有JR Pass既關係，加上坐多一個車站反而可以早D去到，所以我又選擇試下新路線。去到飯山驛仲早，順道去觀光中心問下有無禮物，如果有留意JR PASS既簡介，當中會有提及某幾個車站可以換記念品，飯山驛喺其中一個，記念品喺水彩畫既名信片。起初職員都唔太清楚有哩樣野，搵兩搵，終於成功拎到名信片。

之後就搭 0910 班巴士 (如果由長野出發要坐1015) ，成程車只有我一個乘客，同司機講去monkey park 就可以，落左巴士之後，原來喺要行一段路程先到地獄谷，來回近四公里，著住保暖既衫同揹住重重既背包，結果一停低就開始流鼻血，喺入口前休息左一段時間先入去。入到去之後，發現地獄谷其實唔大，又喺一眼睇曬，只有一個溫泉池，成個峽谷都住左唔少馬騮，開頭唔喺好多馬騮浸溫泉，只喺晏左開始涼，愈黎愈多馬騮去落去浸，間中馬騮之間仲會為左爭地盤大打出手。哩度d馬騮唔似香港，短毛短尾，亦唔會搶野食，可能日本喺哩方面既教育做得幾好，馬騮一般都喺喺地下或同伴間捉虱搵食。喺度唔經唔覺就行左個幾鐘，之後就落番湯田中坐電車回長野，如果喺鐵道迷既話，哩條電車線有唔少退役舊車頭仲喺度行緊，而我今次坐既就喺上代成田機場特急。

番到長野，見有少少攰，最後都無行去善光寺，先返輕井澤休息。只喺一返酒店放低背包就一身鬆曬，見仲早又想行下，於是只帶相機兩手空空咁行去雲場池睇下。雲場池喺一個出名睇紅葉既水池，只喺紅葉早就落光，剩下光禿禿的枝頭。行多兩行就番市鎮用膳結束一日的行程。