Day 95 向日葵田

喺日本賞花，除左櫻花同紫藤外，其實仲有好多選擇。唔同季節都有該季既應節花，而今期就喺賞向日葵。查下資料見南知多有個觀光農光可以賞花，有少少交通不便都去行下。先坐名鉄去到內河，之後就等個班一個鐘一班既巴士，兜兩兜就落車，只喺落車之後又要喺曝曬既車路慢慢行番上去農場入口，入口非常簡單，同一個細溫室差別不大，每人收費690円就可以入場，比完錢仲可以拎把交剪出去剪花走，每人限剪五朵。
出左溫室就可以行去向日葵田，估唔到實情喺得咁少，只有五塊田，當中得三塊盛放，一塊半開，最後一塊仲未大，就近路邊既向花葵有唔少已經比人剪左，不過無影響外觀，但喺當日有唔少向日葵都已經變左做向地葵，所以望落去一啲都唔吸引，再加上花瓣都開始皺，遠看成堆向日葵就好似喺涼茶舖買一包包用黎煲菊花茶既菊花。只喺一場黎度，總想搵個比較好既角度影番張相留念。

行完之後依然陽光猛烈，避免中暑就決定提早番去名古屋嘆冷氣。

Day 86 濱松一日遊

早幾日搵資料時留意到日本有唔少鐘乳石洞，當中喺名古屋隔離既濱松市內都有一個，雖然資料提到哩度個鐘乳石洞唔大，但喺諗到自己一直都未睇過，再加濱松市內既空軍基地有個飛機博物館對外開放，於是就決定去一趟。

去鐘乳石洞既巴士又喺一個鐘先一班，等左一陣就有車，落車之後行大概五至十分鐘就到洞口，入場費唔算平，接近一千円。時間尚早既關係，入到去仲見工作人員做緊少少清潔，望住一舊舊既鐘乳石，真喺無乜特別，或者哩度唔夠壯觀，唯獨中段有個地底瀑布，水源由石壁既細洞孔噴射出黎，算喺行程最特別既一個景點。離開之後就喺入口旁既冷水池浸腳消除一下疲勞，池水非常冰冷，浸大概一分鐘已經要上水。浸完之後就行番去車站搭車番車站再轉車去空軍基地。

空軍基地離車站有一段隔離，落車後仲要行大概四個字，天氣炎熱下行路的確幾辛苦，路上不時聽到戰機飛過時既噪音。去到目的地就先去模擬駕駛體驗艙排隊登記，只喺對方不斷講大堆日文，根本唔知喺度講緊乜，總之成功登記到就算，見仲有成接近一個鐘後先可以玩就慢慢參觀下，哩個飛機博物館展出左唔少日本防衛隊既戰機，當中亦有二戰時期既神風敢死隊招牌零式。就番時間番到模擬艙既地方，一開始會有個簡單既講解，之後就會喺實際操作，我揀左最高難度既模式喺有升降同模擬攻擊，只喺我除左起飛個下成功外，其餘既項目的失敗，短短五分鐘全無刺激就結束，相比喺模擬艙，我覺得直接坐上喺退役既真正戰機特別得多。

行完之後就喺回程車上中途跳車，順便行埋濱松城，只喺城樓真喺無特別，兜個圈就決定去多個即興景點，一個喺買巴士套票時發現既地方 - 中田島砂丘，出發前就先兜下個濱松私鐵站影下火車，之後就搭番巴士去砂丘。起初以為同烏取砂丘一樣咁壯觀，點知去到係兩回事，只喺唔想咁想回程就喺海岸邊執石砌石，等到日落就回程。

行程結束 DAY 118

是次旅程正式結束 有時間再補打番期間既行程

Just for Eat - For record

記錄外出用膳之餐廳清單~

富士山上 (下集)

懶得之後又要排過曬啲相既次序 直接當下集~ 相片喺凌晨攻頂到落山期間影 亦懶得去執 有時間再慢慢揀相執下 XD

上集經過一番辛苦終於挨到上3405米既御來光館 喺度享用左一餐豐富既晚餐之後就打地席咁休息到兩點再攻頂 只喺短短既四個鐘根本喺無訓過 先黎隔離好似行雷既鼻鼾聲 再過一...段時就熱到透唔到氣 結果我都費事訓 坐喺度閉目養神算 去到十二點左右就陸續有登山者出發攻頂 裡裡外外都非常嘈吵 最後我終於頂唔住拎番個耳塞聽歌

兩點準備好行裝就再次出發 只喺哩度就做左一個錯既決定 以為落山會再經就兩手空空著左所需既行裝就行 無去揹袋 結果中段唔知幾時個牌就喺手腕上跌左都唔知 之後亦因為唔經又要番轉頭拎野再上多次山 喺半夜攻頂期間 基本上都喺塞車咁行 行速緩慢 所以著左一堆保暖既衫褲都唔會覺得過熱 大概四點左右就慢慢行到上山頂 喺落山路口附近揀左個平位坐下休息等日出

之前睇資料話唔喺咁易可以睇到御來光 所以今次真喺幾幸運 等到四點七左右就開始睇太陽阿伯既蹤影 再過多陣就已經好刺眼 而身後既一班跟隊登山客亦睇完御來光後就離開繼續行程

喺哩個時間 我先留意到落山唔同路 所以就碌落山去拎野 用左唔洗半個鐘就碌番去山屋 行番上山條路落山 個下又覺得幾好行 啲石又喺跣住咁去 有舊好似啲2kg 米包既大石亦因為唔喺太重比我兜腳就踢到打左幾個轉 好在時間尚早 無乜人喺哩個時間登山 唔喺既話都幾危險 落山個時真喺會踩到啲碎石四圍碌 落到山屋已經覺得好熱 所以決定除曬身上既保暖衣 重新整理好紥起背包上 喺山屋總共抖左三個字就慢慢行番上山 只喺行到九合目開始覺得有少少攰 只好行下停下 最後行左一個鐘多先上番到頂

上到頂抖左陣就回程 無再喺環繞火山口兜過圈 由山頂去七合目既路段喺吉田同須走路段同路 哩段已經喺一段砂走路 過左七合目分道揚鑣後 初段既須走線唔喺砂走路段 而喺普通碎石山路 小心都無用 結果我都喺要每個山頭上都要撞損少少 一個落級位就成個人坐喺度 只喺過左之後就開始無難度 喺須走七合山屋食番幾粒朱古力充飢又繼續 之後就喺之前個條片既較斜砂走段 基本上踩落去會覺得啲砂沉到小腿左右 可能喺斜度問題先有咁既感覺 每步都踩住啲砂丘頂咁跣落去 中途啲石只要唔喺太大舊都唔洗避 實可以踩得到 只喺我每次去到隔離有人時 減曬速講句早晨就 pk 真喺唔可以分心 近底附近就會經過佢啲林 去到砂広五合就變番普通山路 落到終點只喺十點四

問題喺 原來須走個邊無乜車走人 我唔記得嗰日喺閒日 純粹咁岩有位觀光職員主動問我會答乜車走同埋有無隊友喺山上面先知道原先班車要 1345 先有 只喺哩個時候外面又有一架巴士等客中 咁我就問佢班車去邊 原來都可以去到我要去既地方 純粹落車要行多幾步 只不過上車前又有段小插曲 就喺講價 哩班車出奇地貴 坐一坐要1190円 原先要搭個班只喺560円 我就問點解咁貴 但佢就問番我有無飛仔 有飛仔平啲 張飛仔就喺上山個時個張車飛 但上車個下已經比人收左 結果我地既對話就好似鬼打牆咁 重覆又重覆 最後佢就同車長講 比我哩程免費落山 @@ 萬分感謝就上車 因為夠鐘開車 落左車之後 行大概就十分鐘就到由御殿場開往河口湖既中途巴士站 比佢講既30分鐘路程近得多 坐車訓左陣又比班內地客嘈醒 落左車後亦因為開往名古屋既巴士最快五點先有 成個晏晝挨住眼訓兼電話無電下呆等 期間飲左車站食店既咖啡 真喺唔好試 難飲到好似麥記咖啡。

完。

富士山上 (上集)

雖然我哩日好早起身 但喺咁早起身純粹比隔離床既泰國人嘈醒左 只好去晨運 四點幾出門晨運到七點番去再訓 未出發就先行六公里~

十點八坐巴士去吉田五合目 一個鐘車程就到 估唔到五合目擠滿遊人 除左登山者仲有唔少旅客 喺度用餐到一點就正式出發 一開始先喺登山口比協力費一千円 會拎到一...本小冊子同埋一個木牌仔記念 但喺唔知點解我比完錢之後個職員又比番張一千円我 @@ 小冊子話就話七合目開始辛苦 只喺普遍大家都覺得前段都唔好行 反而到左七合目仲好行 因為前段都喺碎石路之餘 周不時好似喺沙灘行咁 向前行但會跣番去原位 嘥多一重力

慢慢行 行到七合目就去到第一間山屋 我亦喺度買塊牌開始集郵 之後既路就大石級為主 部分比較大級 但可以一步踩穩 喺七合至八合期間 已經慢慢高過雲層 可以睇到雲海 行到六點終於到八合目 只喺黎山屋仲有一段隔離 需要行上本八合目 相差海拔四百米 見開始天黑關係我著定保暖衣物 結果之後既路程行一行就好熱 覺得特別嘥力 慢慢行到上3200米既白雲莊還好 只喺行左一段長時間 體力明顯下降 之後上去3400米既本八合目中途開始頂唔順 每次覺得心跳得比較快或大力就停喺度回番順條氣再上 順便咬番塊救命餅 我最愛既朱古力曲奇 食完補充番啲熱量就少左氣喘 之後八點行到上本八合目 再行到多四個字就上到今日既目的地 御來光館 咁岩哩段時間岩岩月出 可以睇到紅月加天蠍座 上到山屋因為對方指今日入住人客較多 所以要即刻用餐 之後方便佢地執位鋪床位 跟住就睇下集喇~

河口湖 DAY 103

第一次坐夜行巴士 喺名古屋搭2310班車直接去河口湖 只喺成程都喺訓下醒下 0430左右架車已經泊左喺河口湖附近既停車場 等到朝早七點左出車去富士急樂園同之後既站 落左車先等到間 guesthouse 開門放底啲行裝先 之後兩手空空揹住部相機加喺褲袋塞滿曬要用既物品就出去 番到車...站都喺決定買張1300 巴士觀光pass 用下 哩度啲巴士都幾食水深 散搭都勁貴 同埋去到邊都好嘈吵 太多旅客

第一站我揀左河口湖線既尾站 大石公園 哩度有一個薰衣草園 再加上背景喺富士山 所以超多人 人多對我黎講就等如無心機 加上成晚程車訓得差 喺公園向湖既另一邊見有個無人既公園 喺度無無聊聊打下鞦韆 之後再訓喺長椅訓下 反正條路極少人經過 點知抖左大概半個鐘有一家內地客行錯路經過 嘈左少少就走人去行番個公園 兜左個圈就走人 真喺無乜心機影 跟住等車又唔知喺咪連續有兩架車到 所以第一班車落完客就直接開車走 真無奈 回程路上揀左喺中途跳車轉西湖線 先喺蝙蝠洞站落車行下青海原樹海 只喺遇上之前提到既問題 轉過頭就走人 但哩度啲車喺半個鐘一班 又唔想入去睇蝙蝠洞就去左睇下佢今期免費既小型水族展 無乜特別 跟住就坐車去雀鳥公園 估唔到一個人都無 坐喺個涼亭咬下飯糰 食飽又行到樹海邊邊睇雀 但喺乜都睇唔到 跟住就坐番車出番去河口湖 黃昏左右再出去兜過圈

休息日或無特別日不再特別記錄~

如題

平時哩啲日子唔喺訓覺買餸就喺打機思考，什麼是人生，應該追求什麼，餘下來在日子應該怎樣安排，好天氣跟壞天氣又應該去做麼，來到梅雨季，不時原先安排了的活動最後亦因為天氣欠佳而放棄，唯有退而其次，改到市內逛，不斷望住自己整既家計表去計劃一下日行程。

日語能力試的迷思

又黎廢話 香港既教育制度向來都重視分數 當然外國都有考試但感覺上相對無對分數睇得過重 眼看唔少準備出發去日本 WH 既人都不斷互相比較日文能力 考 N 幾或持有 N 幾 只喺個人既睇法喺 考試既分數只喺一個參考指標 無話拎住 N 幾就有對等既會話能力 太過執著於一啲分數而忽略實際運用上 喺有少少問題 學外語既目的理應喺何時何地都識得聽講讀寫 如果純粹喺追求考試合格 咁同考會考讀啲精讀班貼題無乜大分別 

紫陽花祭 DAY 80

喺日本，繡球花喺叫做紫陽花，唔知喺咪因為啲花有時紫有時紅加上又圓，好似紫色既太陽咁呢。

過左櫻花季節之後，當地一般都喺會跟住去賞紫藤、芝櫻，跟住就會喺紫陽花，只喺當啲花唔喺開得好密既時候，個人就覺得唔喺特別靚，純粹色彩豐富。其本要賞花唔需要刻要去啲賞花地點睇，因為有唔喺當地居民都好鐘意喺門口種紫陽花，所以平時經過啲細街都可以睇到。

只喺今日我選揀去市內既日式庭園 - 白鳥庭園 - 賞花，因為當日有個紫陽花茶會，我想去試下個茶會就順道去賞花。白鳥庭園地方唔大，相信平時三個字就可以行完一圈，而且賞花地點既紫陽花亦唔算多，只喺當日我要等兩個鐘先可以參加茶會，結果喺園內行下坐下，慢慢HEA，慢活一下。

參與茶會前，可以喺中庭聽下琴箏，而個茶會主要喺由一班外藉人士喺度學左啲基本茶道再招呼大家，一開始有示範環節，示範茶道中由開始到沖泡一碗綠茶既過程，之後就由幕後已經沖泡好綠茶同準備好既茶點逐一送到賓客前。哩個過程會睇體驗到一件事，就喺忍耐，沖茶可以好簡單，只喺佢地需要當住客人面前逐一展示清潔工具既過程而示整潔，而且每次為客人送上綠茶加茶點亦只會同一時間只有一位在外招呼，唔會一堆頭一口氣送到各人面前，同時亦包含左一啲禮節，入鄉隨俗，接過茶點後都會鞠躬以示答謝。至於享用方便，亦同時因為禮節唔會大啖地飲或食，某程度可以加深對味道品嚐上既講求，算喺一個唔錯既經驗。享用完茶點之後就到分享會，主要由負責示範泡茶既外國人講下佢喺日本既經歷同埋點解學習茶道。

活動完左就番去休息下，只喺之後見無乜野做又有一日券喺手就出去商店街影下夜景。

薰衣草 DAY 77

之前無野做時行公園，留意到個公園有一個小型薰衣草園，當時估計會喺六月左右開花，結果唔洗估估下，平時坐地鉄都見到有相關既海報介紹，講話由 12/6 - 18/6 期間叫做薰衣草節，所以趁住好天又得悶悶地無野做，就將近黃昏行多次過去望下。

棒球熱 DAY 76

在早前空閒的日子上網期間，看到背包客棧有位背包客將會來名古屋玩，由於一個人平日比較少機會嘗試到一些多樣化的菜式，所以嘗試跟對方聯絡看看能否一起共餐。來自台灣的她原來是一位棒球迷，為了追看球星先由北海道再來名古屋及東京追看心儀的球隊作賽，而我亦應邀一起觀看其中一場球賽。棒球對我黎講就唔算陌生，特別喺上年既一套熱血本土電影 - 點五步 亦講述當年香港既一支本土球隊 - 沙燕隊 奪標的故事，只喺當去到棒球賽事上既賽規同計分方法，我完全喺一張白紙，所以只好喺前一日上網查定資料。

球賽喺市內既巨蛋開打，第一次走進巨蛋就好似去左紅館一樣，當日我地坐喺客隊既應援席，即喺打氣位，所以整個賽事只喺去到客隊做主攻隊就會唱歌吶喊，氣氛非常熱鬧，而經過友人既賽規介紹後，去到第二局已經明白球賽既打法，所以去到一啲拉鋸位自然都會好緊張，只可惜當日賽事所捧既對隊伍最終落敗。

睇完球賽就食餐，一場球賽接近打三個鐘，所以睇完都幾餓，揀左去和民食，格局上同香港既有少少分別，而個待應亦比人一個壞既印象，就喺歧視人講國語。

行山日 DAY 74

休息一日又可以出去行下。

今日就揀左去犬山個邊行下一個山名對港人黎講都幾搞笑既山 - 鳩吹山。即喺鳩噏。只喺估唔到出發無耐就遇到一件柒事，要去犬山一般都喺坐名鉄，只喺前往方法有幾條線可以揀，為左慳錢，我先買地鉄一日券坐到最遠個站再轉名鉄，咁岩坐到最遠個站喺會喺中段期間直接轉乘名鉄線，結果我坐到犬山都喺無買過任何名鉄車飛，問題就出現喇，我要落車既車站喺可兒川，轉埋線都仲只喺手持一張地鉄飛，我就開始諗緊可唔可以出到閘呢。唔洗講都知係唔得，只不過每個站一般都會有部補票機，到時買咪得，點知原來補票機要入名鉄車票先比補飛，一次唔得就彈番張地鉄一日券出黎，兩次唔得就食埋地鉄券落肚，結果喺個站到又乜飛無曬，進退兩難，重點喺哩個係無站長，所以無可能一開始就搵站長解決問題。結果我就第一次喺日本玩下個車站對講機，乜事乜事，我買唔到車飛由比部機食左我手頭上唯一既飛呀。成個對話都喺我有我講，佢有佢講，我就不停講英文，佢就不停講日文，最後點解決問題? 就喺佢又開個google translate 出黎翻譯啲唔知乜英文比我聽，完全唔知講乜就同佢講叫佢搵個staff 過黎喇，結果由開始對話起計，三個字後就職員到，佢先入去幫我拎番張地鉄飛，我再同佢講我喺邊坐過黎，之後佢就隔空同控制台個邊覆述一次，由控制台隔空遙控部補票機比我入錢買飛。搞左一輪都喺比預計遲左四個字起步，還好喇。

柒完之後就慢慢行去登山口，先喺登山口下面公園兜個圈再上山，今次哩個山唔算辛苦，轉兩轉就到山頂，可以一眼望曬整個地區，行到分岔口我就決定唔跟書行，改行另一條路經繼鹿尾山行去犬山城既路線，轉左路線之後，路上既行山客明顯減少，去到中後期更只有我一個行，上上落落幾次，感覺就好似行孖崗山既樓梯路，之後終於到休息既涼亭，哩度可以望到犬山岐阜同埋名古屋市既摩天大廈。抖完之後就落山，最估唔到喺諗住行到車路就有補給，點知無論寺廟定青年旅舍都唔見到一部水機，最後行多成三公里路出番犬山木曾川既鵜飼等候室先有補給。之後再沿路行番去之前犬山祭經過既大街。

番到車站食完個包就諗住番去久屋大通試下其他口味既雞翼，只喺估唔到番到去已經六點，活動已經去到尾聲既頒獎環節，無曬雞翼賣，只好等多陣睇下邊隊拎金賞，結果竟然喺我第一間買既一檔。知道結果就行去超市買壽司番去食。

休息 DAY 73

尋味 DAY 72

幾年前領匯都用過尋味哩個詞，但喺劣評如潮，因為佢地扼殺左好多小商戶既生存空間，結果大量連鎖商品進駐，真喺哪來尋找得昔日既風味。

今日終於決定一早出門去試下一早計劃左但上次賣完試唔到既鰻魚老舖，就番時間坐車去尾張瀨戶，落左車慢慢行過去，估唔到只喺比開舖遲左五分鐘去到都已經要等位，好在人龍未算多，只喺要等五位，前面既日本人幫我同老闆講聲我喺黎等位就可以，哩間叫田代既鰻魚舖喺日本既開飯喇排名好高，聞說喺該網既全國鰻魚飯排第四，今年仲拎左佢地既銅獎食肆。等左陣老闆娘就問我要點邊個餐，我揀左最基本既一匹分，即喺一條，上既份量有一匹半分，未喺好肚餓所以唔想叫多浪費食物。點好之後就入舖內坐，大概等左三個字就有得食，份量十足，鰻魚就只能說各家各有特色，睇個人喜好，個人食完無個種超級好食既感覺，但喺論鰻魚既品質，哩度既真喺好肥美同大份。

食完鰻魚飯見飽就去左隔離既公園仔坐下休息，休息完就慢慢行下瀨戶市內既陶瓷街，睇下啲陶窰，哩日陽光非常猛烈，慢慢行都好辛苦，景點亦唔算特別，所以行完一圈就番去車站，其間喺大既商店睇下陶瓷商品。

番到名古屋就坐到榮先落車，因為由今日開始會喺久屋大通公園有個一連三日既手羽先比賽，即喺個啲乜乜金賞，今次喺名古屋區既雞翼賞。普遍商戶都要兩隻起咁買，價錢亦唔平，最後揀左一間可以單賣但三隻只喺250円既舖頭試下，買完之後佢會比張飛你，憑飛可以去入口個度搵投票幣投票比你覺得好味個間。個人就覺得哩三隻雞翼完全唔入味，純粹雞肉滑，外面醬油幾香。之後再喺另一間買左一隻試下，今次就覺得好似脆皮腸咁，外皮一陣煙薰味，幾特別。試左兩間之後，就決定去超市買平價壽司算。

蛍之歌 DAY 71

前一天至今晨都下著雨，只是見中午開始放晴，有點悶的關係就決定外出一下。特意買了地鉄一日券，先再去東山公園站下車去看看一個地圖上不顯眼的地方，中文譯名為東山之森，是平和公園範圍內的一個非市政府管理的綠地，整個環境都其他綠地相近，有濕地及幾片田地，另可以沿山路走上小山丘在林中觀鳥，至於另一邊出口就是平和公園，算是名古屋區內的一個大型公墓。

行畢公園便坐車回名古屋車站逛一逛商場，順便去書局看一下書，估唔到期間撞到房友，傾左陣都各自繼續行程，先去超市買特價壽司再準備出發去今晚既第二個景點，就喺市內守山區既綠地睇螢火蟲，哩個公園每年都會有螢火蟲祭，都喺一個按番往年數據推斷螢火蟲出沒的高峰期晚上，喺哩段期間會有足夠照明同工作人員指示前往賞螢的地點。由大曾根坐一程高架巴士就可以直接去到，到達時間尚早，橋上只喺得幾個人等待中，不過見條橋唔想闊，同一時間只可以容納到兩個人走過既闊度，所以喺附近兜一兜都番去橋度 set 腳架，相比早幾日喺近江長岡，今晚哩度既螢火蟲比較集中，數量亦唔少，最後由七點半見到第一點螢光後，影到八點九都決定走人，賞螢都喺用眼睇比較靚，長曝效果所出黎既相張張都好相近。

小幡綠地。

宅 DAY 69-70

宅。第一次逃學。

熱田神宮祭 DAY 68

星期六揀左睇賽車就無去到德川園睇祭典，見今日市內又有祭典就唔錯過。上網查左行程表，見一點就有個未睇過既環節就十二點左右出發，只喺原來棒之手喺好似個啲武藝表演咁，見無乜興趣就行去睇下弓道，之後再去睇埋個啲文藝節目見無乜興趣就去到隔離公園做下公園伯伯訓長椅。等到五點左右就番番去神宮睇下各入口既山車掛燈，相比之前，哩度既山車喺無外型可言，掛左燈就會好啲。最估唔到喺哩個祭典愈夜愈多人，人流好多好似行年宵咁，之後就番時間去對面河畔等睇夜晚既煙花。咁岩今日有兩位同樣黎日本工作期假既網友都過去睇煙花，所以完左之後約埋一齊食飯，算喺黎左咁耐第一次同香港人聚餐。

棒之手 

彥根城築城410周年 + 螢之歌 (序) DAY 67

黎度日本有時想睇啲香港睇唔到既節目，早幾日搵資料發現今日彥根城有個記念活動，期間會有日本航空自衞隊既飛行表演，所以將本來安排左既行程都先改期延後，再去多次彥根城。

查左時間表之後，見飛行表演一點鐘先開始，而餘興節目就十點半開始，所以我就打算早少少去到，點知個朝我要搭個條線遇上人生意外，有人喺上一個站跳軌導致全線停駛，七點半去到車站見七點一班車仲未到站，而站外亦有告示寫住因為意外而建議乘客轉乘名鉄，只喺我見時間尚早就繼續等下，但喺見等左八個字仲未通番就打算轉名鉄，但又同時考慮緊後半段要轉番 JR 時會唔會同樣受到跳軌事件影響，因為該段車全部都喺由名古屋發為主。上番閘口見喺純粹退錢又十五十六諗緊退唔退，最後選揀出閘諗住叫個職員比飛我轉搭名鉄，點知又比人就咁耍走我，去到名鉄又叫番我去 JR，個一刻我就唔理咁多，直接唔排隊過閘入番JR，之後見有人跑過去車站就知有車到，二話不說就衝落月台上車，往岐阜既普通慢車照上，正所謂過左海就喺神仙，去到岐阜就得，結果班車中途按平時班次咁喺名古屋大站停十五分鐘，平時可以喺哩度轉搭快車，但喺今日班快車無緊隨其後，等到夠鐘就正常車速開去岐阜。到左岐阜要轉車，因為去彥根要坐到米原轉坐 JR 西海道，唔再喺 JR 東海管轄範圍，同時謎底揭盅，我既估計喺無錯，去到岐阜同樣見到有列車延誤既告示，而誤點已經超過一小時五十分，等左陣終於見到架去大垣，坐到大垣再轉車去米原，點知坐到一半就停左喺路中間，去到大垣已經見月台迫滿曬人，十點幾都仲喺等0719由金山發既特別快速往米原，即喺轉名鉄只會嘥車費又唔會快啲到，而我亦可以喺金山站繼續坐唔上慢車，直接等到哩班特別快速先上車。最後，我比預計既時間遲左大個半鐘先到彥根，11點多先到達，落車先去拎記念品就炒小路行去彥根城。

行到城畔周邊發現天橋因為人潮問題而封閉，只好折路兜番入會場內既公園等待，大概坐左一個鐘就表演正式開始，整體感覺一般，或多或少是角度問題，完全看不到飛行表演同彥根城同時出現在鏡頭下，同時花式跟空中畫圖的環節亦很少，短短廿分鐘過得很快。看畢後就炒小路回車程去下一個目的地。只喺車站人潮太多，職員見售票機大排長龍亦派發乘車券方便乘客入閘，只要下車時去出閘口找站長支付車資便可。

第二個目的地就喺上次行山落山時經過既地方，話說個度睇螢火蟲出名，只喺今日仲喺季初唔知多唔多，三點幾去到但遇上腳痛只好坐喺田邊休息，唔再行去一個營地公園試玩個條100米長既滑梯，坐喺田邊影下新幹線等到日落，差唔多七點半先見到第一點螢光，可能真喺季初關係，雖然有一定數量但分佈比賽分散，而且主要伏喺葉上休息，無乜螢光喺半空飛，最後都懶得影，慢慢用眼欣賞，大概九點就坐車番去。

震耳欲聾 DAY 66

之前一直都想去下附近既鈴鹿賽車場，因為哩度喺 F1 日本站既賽道，不時上網留意下官網日程，發現由 2/6-4/6都會有電單車賽事舉行，而且只需要比入場費就可以觀賽，唔需要額外買座位席，一來可以比少啲，二來又可以四圍搵位影相，所以我揀左今日過黎參觀。

喺白子站落車再轉巴士就可以直接去到賽車站，只喺一個唔小心掛住喺車站望下隔離架旅遊巴喺咪免費去賽車場就無留意前面有條柱，結果撞到應一應，搞到條頸痛左一排。

去到賽車場基本上都喺四圍行，當中特別喺髮夾彎同埋看台留左最耐，每次車群經過都聽到好震耳既引擎聲，特別喺看台區睇既話，引擎聲連埋回音會感覺到坐緊張櫈都震緊，非常震耳。差唔多成日都喺度影賽車，喺中段午飯休息時段行下佢個小型主題樂園，一個合家歡樂園，基本上好多遊樂設施都喺為小朋友而設，當中亦以汽車為主題，由於各項設施都另行收費，所以我都喺參觀下就算。

結果由朝早九點影到傍晚五點先走。對我黎講喺一個唔錯既經驗，一來我未睇過賽車，第二就喺我未試過 pan 鏡，今日有好多機會比我嘗試同練習。

休息 DAY 65

有見接下落黎三日都要連續外出，所以今日都喺全日休息，喺傍晚時間行一行去海邊散步。

東山動物園 DAY 64

今日終於出去行下，去左市內既國營動物園，今年已經開幕80週年了。入場券方面買左動植物園連票，點知後尾發現行去植物園個度喺無人查飛，又喺一個可以偷雞既地方，當然唔建議大家咁做。

動物園來來去去其實都喺睇個啲，有時覺得天氣熱地方又細，做被人困住既都幾慘，雖然哩度唔喺用籠困住，喺半開放式動物園，好似當年荔園咁，純粹猛獸類先用籠困住，但一樣覺得佢地喺個樣喺無精打采。睇完動物就行去植物園，咁岩哩排個洋式溫室裝修，無得見識下BBC 拍植物溫室個種溫室外觀。植物園除左溫室外，仲有日式園庭、合掌屋，花田，只喺都相對無乜特別，喺度都喺影下蜻蜓，行到四點三見差唔多夠鐘關門就行去另一個山口坐車走人。

閒 DAY 61-63

閒日就是特別清閒，星期二既日文班悶到接近訓著，純粹上堂食左個天婦羅飯比較特別啲。

衘在所山~~~~腳 DAY 60

前兩日都行黎行去見攰，本來諗住今日去行御在所山，最後決定唔行直接坐纜車算。坐車大概十二點半先到山腳纜車站，點知售票處貼左告示話是日大風每半小時一班，而家賣緊兩點鐘既飛，諗左陣就決定唔買，因為回程尾班車係五點，到時趕排隊就有啲無謂。結果我喺車站隔離食左碗喺日本咁耐以黎最難食既一碗咖哩烏冬就行左去隔離既蒼滝，本來仲想過埋去大石公園，只喺中段山路話山泥問題封左，加上對腳幾攰，兜番上車站就行番去巴士站，攰到連車費都懶得慳等巴士坐番去火車站。到左車站就坐番個雪糕再坐火車遊車河，先去左柳影火車，影完之後諗住去彌富影鐵橋日落，但中途坐車上 google 見桑名都有啲地方行下，於是坐到桑名就落車行去海邊睇下個座小城，之後順便試下哩度既特色菜式 - 地蛤御膳。行完先六點半，只喺坐到彌富見日落就完，最後就決定直接坐車番去。落左車經過間 QB理髮店，見人唔算太多就順便去剪個髮，哩次我黎度日本咁耐第一次剪髮，真喺頭髮長到連自己都唔慣，拎相比理髮師參考下，結果又唔錯，而家只喺1080円，總好過比3000幾円雞同鴨講又唔肯定剪完會點。

郊遊日 - 朝熊岳道 DAY 59

繼續燒PASS，說話琴日番去即刻用風筒吹鞋加用腳架掛住對鞋再對正冷氣出風口，吹左一晚終於乾透可以再著，唔洗擔心無岩著鞋而要搵啲小市鎮亂行磨時間。

今日既目的地都喺伊勢附近，所以同樣地要搭同一時間既班次，只喺今日出門晏左少少，結果就走左班地鐵，最後去到名古屋站要跑去近鉄站追車，廢事慢行去到 miss 左急行要慢成八個字先到。坐車去到朝熊站，發現哩個站又喺自出自入型車站，真喺逃票都無人知。由於今朝出門太心急，上左火車個時已經發現唔記得本行山書，所以坐車個時上定google搵定登山口，好在出左車站都有明確水牌指示，行十分鐘左右就到登山口。入口前有個人頭計，方便記錄當日有幾多人登山，而我喺當日第六十五位登山客。

相比之前行既山，今次明顯路面簡單，但喺疲勞感喺唔覺眼咁不斷增加，因為條路又喺唔停咁暗斜直上五百米，沿路唔洗擔心行錯路，可能喺古道關係，路旁每隔100米都會有個地藏指示牌，登山段共 2.2km，所以一共有22個地藏。走完山路後就有個細既平台位可以回望整個伊勢地區，之後就行車路上山頂，係山頂又喺食番個飯糰休息下，之後就沿路兜去金剛證寺，睇資料就話喺姬路城城主池田煇政公所設計，唔曉日文可能有啲出錯。兜完一個圈就行去隔離既觀景台，哩個觀景台可以360度望曬伊勢鳥羽同背後山群，另外就有一個戀人勝地系列既郵筒同露天觀景足浴池。

本來諗住搵路行去鳥羽，只喺無帶書無地圖關係，就算上網搵到等高線圖，穩陣起見都喺原路折返，始終行去鳥羽要行 4.2km，再加上中途經過車路，錯過落山口就好難搵路落。慢慢行番去第22個地藏就開始全速落山，基本上就喺跑落山，雖然路面普遍都佈滿好似鐵道墊地既石仔，但喺都比較穩，好少鬆石，最後跑左五個字就落到山腳。

慢慢行番出車站後就決定唔再搭車去鳥羽，直接番去休息。

 

伊勢遊 + 落湯雞 DAY 58

話說星期二買左張近鉄套票，內容就喺可以喺五六日期間無限次乘搭近鉄普通車。由於本來都有打算再去三重県，所以用上哩張套票可以慳少少車費。

第一日既行程就喺去伊勢神宮，坐比較既早既班次，九點多就去到伊勢市，只喺到埗後一直落住毛毛細雨，先去較近既外宮，兜左個圈覺得其實無乜特別，之後就慢慢行去內宮，開住遮慢慢行去都幾攰，最後用左差唔多十個字先到內宮前既市集，喺度見賣樂宝既舖頭前有隻招財蛤蟆喺度比人摸，見幾得意都買番張做記念。之後經過間烏冬舖見好多人食，見肚餓又未點食野都去食番碗，食完先知原來哩間烏冬差唔多喺去神宮必食。食完就行左轉內宮，基本上同外宮一樣，兜完個圈就番市集睇下啲招財貓，因為哩個小市集其中一個賣點就喺有啲特別造型既招財貓分佈喺唔同舖頭之間。搵左陣見有啲搵唔到就去買盒伊勢特產 - 赤福當小食。之後就慢慢行去五十鈴川站坐車走。

上左車之後就喺度搵下有邊好去，最後都喺打算再去四日市附近影工廠。時間尚早關係我就先喺一啲細站落車影下田野風景同火車，等到接近黃昏再坐車去塩濱站，因為之前喺 GOOGLE MAP 搵野時搵左個地點想去望下，最後行左大概半個鐘就去到，的確可以好近望到工廠區，只喺仲未入黑就行到最出睇埋伊勢灣先番去影工廠。點知等等下又開始落雨，見遲遲都未黑曬，附近亦開始無曬人，我就決定等多一個字走人。回程其間突然倒水，結果有遮等如無遮，踏左幾個大水氹搞到對鞋入曬水，最後下半身濕左一大片先行到車站，回程車上我覺得自己好似瀨尿咁，啲雨水慢慢慘番出黎搞到一地都喺水。

結果第一日用套票就喺咁狼狽既情況下結束。番到去我第一時間諗辦法吹番乾對鞋，唔喺無鞋著出街用唔到仲有兩日可以用既套票。

閒日無特別 DAY 55 - 57

又到左最無特別既閒日時間，除左星期二去上堂時順便去埋近鉄站買優惠套票外，其他日子又喺打下機買下餸咁過。真喺幾浪費光陰，啲日文上完堂都無溫習過。

附近逛 DAY 54

無所事事下，晏晝坐到悶都喺決定出去行下，本來諗住行去野跡睇雀，最後行到半路覺得太曬都喺改地方，轉左去近少少既荒子川公園，哩度就喺上次同 Roommate 燒野食個公園，喺度兜左個圈就番去。只不過途中見到一叢黃菊幾靚，停低影左陣。

宅 DAY 53

琴日出去成日加揹住腳架，有少少攰攰既情況下就決定唔出去休息下。

親親河谷 + 工廠夜景 DAY 52

計劃行程上，我一般都會選揀一啲郊區地方睇風景，今日先去三重県既赤目四十八滝，坐近鉄去到名張隔離既赤目口再轉巴士就到山口。哩度故名思義就喺睇瀑布，只喺字面上既滝又唔係完全等如瀑布，純粹喺解作一啲有落差既流水位，實際全段都喺大概得八個瀑布左右。一開始先喺入口比300円做入場費以作為山區保育費用，入口隔離就喺一個小型展覽館，集中展示山椒魚，原來哩度喺其中一個山椒魚既原生境，所以連吉祥物都用佢黎做代表。睇完之後就沿路直行，短短四公里路足足行左接近兩個半鐘，因為邊行邊影，有幾個瀑布的確幾靚，只喺唔算特別壯觀。行到終點就食飯糰補充體，之後就慢慢沿路行番出去，順便去番蓋章位蓋印留念。行到入口位心血來潮睇一睇番本筆記簿發現仲有一個字後就有車出番去車站，即刻收埋跑出車站，岩岩好趕得切上班車，如果唔喺就會駁唔到火車去下一個目的地，到時就會足足遲一個鐘先到。

下個目的地就喺去四日市影工場夜景，坐火車留意到四日市既工廠區好大，於是坐車期間就上網查下可以喺邊影夜景，最後搵到個喺北區有座觀景台可以喺14樓影曬成個工廠區。喺近鉄富田落車慢慢行過去，足足行左成八個字先到。觀景台有得借黑布遮光方便影相，只喺當日已經借曬，所以我就坐喺一個角落用風褸當住黑布慢慢影，影左一陣覺得景色一樣無乜特別就因番時間走人。走既時候就唔搭近鉄而轉搭 JR ，點知個晚前一個站有啲問題足足喺車站坐左接近半個鐘，而哩個車站亦好特別，一個關西本線既車站竟然因為使用率低而拆曬售票機同入票機，得番IC出入閘機各一，最後要上到車搵車長買飛。番到去名古屋都十點，差唔多乜野舖頭都收曬檔，未食野又餓即刻趕去最近既麥當當，好在趕得切買番個餐黎食，結果食到一半已經有人出黎話夠鐘清場。

無所事事 DAY 48-51

話說每個星期一到閒日既日子都會無所事事，唔喺上日文班就補打番個BLOG。

當然，既然買左機票，我都要花啲時間喺搜集資料上，要諗下辧法充實埋餘下既行程。另外，當我買左機票之後就陸續有朋友問下點解唔留耐啲，的確自己喺哩段時間都會好矛盾不停反問自己如果唔買機票繼續行程會唔會搵到份岩心水既工，可唔可以再留度耐啲，只喺既然都買左機票，有時諗黎都無謂，總之做乜都唔好後悔，決定既事就要盡自己既努力好好完成埋結束前要做既事。

毅然決定提早離開 倒數開始 DAY 47

無更新成星期，日後再補番早前既行程。

終於到左五月中，經過多番計算，深思熟慮後，我決定七月底正式結束是次行程，工作期假這個目標最終沒有如預期般待超過半年。根本的問題在於本人日語完全是白紙，只會基本五十音，完全不能跟別人正常溝通，英語亦在日本毫無用武之地，旅行遊玩還可以，但在工作上是不能完全不曉日文。在旅費有限的情況下，所有開支都需要有準確的預計方可避免遇上問題時資金不足，有見長此下去總有用光的一天，經過一番計算後，扣除一些想到的景點觀光的費用後，最終決定了離開日期為 25/7 。

在作出這個離開的決定並不容易，因為自己心中亦會有很多爭扎，有時會很想再作嘗試，不應碰壁而放棄，加上身邊亦有人親友朋友建議我再留多久，雖然他們都會尊重我的決定，但是或多或少自己也會再次陷入矛盾之中。只是每個人都有不同的個性，我是一個做事偏向實事求事，眼看自己的不足不能在短時間有大幅明顯改善，與其為求一餐半餐當一些自己根本不想做的工作，這又有點跟自己的原則有所衝突，違反當初決定來日本工作期假的原則。加上個人偏向事實數據，在可預計的薪金收入及各項基本日常開支中，經計算亦得出打工只能應付基本租金及交通費，飲食的開支部分仍需要靠旅費應付，繼而可以推論出日後想到別處觀光亦需動用旅費，打工最主要的得著就是體驗日本職場文化及延長待日時間。

既然定了離港日期，這兩個月時間總不能白白浪費待在住屋中當宅男度日，所以一系列想去的景點亦逐一列出並加入在行程表上，由於經過多番計番，我的旅費是足夠應付餘下日子的觀光開支，所以我亦不用太擔心旅費問題而放棄一些想去的地方。

在日本短短待了個半月，或多或少亦找到一些當初想透過工作期假而得到的答案，認清自己的個性，即使比最初的計劃有些少出入，這個經驗都是獨一無二。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

以下喺哩個半月裡一啲個人好鐘意既相片

靜岡県 - 金谷 。 大井川鉄道

靜岡県 - 靜岡 。 三保松原

愛知県 - 津島 。 天王川公園

岐阜県 - 岐阜 。 鵜飼

愛知県 - 犬山 。犬山祭

若宮祭 DAY 47

每年五月十五及十六日就喺名古屋既若宮八幡祭，哩個喺名古屋三大祭之一，雖然比犬山同高山既規模都細，但喺每架山車都各有特色，上網查左祭慶開始時間就因番時間出門。四點正時祭典正式開始，一眾寺廟既主持人以及各町既代表入寺參拜，而寺外既山車則奏樂納奉，只喺有別於之前見既山車，哩架山車喺無木偶表演，只喺頂層可以成層縮低以便巡行時唔會過高撞到鳥居。當山車開始巡街後，過左幾個街口我就無再跟住車尾行，反而番去會場睇下其他表演，雖然睇唔明箇中所表達既意思，但喺感覺好似睇大戲咁，算喺一種見識，表演既尾聲由一班中年消防団表演昔日點樣架起竹梯救火既過程，真喺大開眼界。表演結束，巡行既山車亦快將巡行完畢，番到寺前再進行一次納奉。期間一個燈籠著火，山車上既人即時摘落黎掉落地，有驚無險。當祭典接近直正尾聲時就離開。

岐阜一日遊 DAY 46

話快又過左一星期，先前計劃左逢周末行山，所以今日都唔例外，只喺地點就有少少改變，本來想去行御在所山，但前一晚一直都失眠，最後睡眠不足都喺改行啲簡單入門既路，目的地就改左去岐阜県既金華山，上到山頂仲可以順道參觀岐阜城。

坐 JR 去到岐阜站就發現有特價巴士套票買，450円無限次坐 210円區域內既路線，見到咁自己都算適用就買黎用，張車飛幾得意，喺一個卡通既大頭織田信長，坐車去到岐阜公園前落車就可以沿公園水牌指示行到登山口，哩條路相比之前既簡單得多，只喺路面都幾多大石，少行既話都可能會覺得有少少難度，沿路就無乜風景，揹住腳架慢慢行到山頂位都要透一段時間回氣，天氣熱加上揹得重真喺幾攰。休息過後就比 200円入場費上岐阜城，哩座天守閣真喺無乜特別，純粹比 200円當去觀景台睇風景吹風，憑券仲有得去睇一個同信長有關既館，只喺裡面擺放既喺信長系列既漫畫或電視劇集既劇照再加一套鎧甲，真喺好無特別。行完之後就沿路行下纜車站個邊既觀景台休息多一陣，曬一陣太陽等肌肉舒緩下就落山，只喺有個路口行錯左就無跟到書裡面所講既路線，反而行左一條折徑，轉兩轉就碌番去岐阜公園，喺公園兜個圈就坐巴士番車站去搵食。由於我出門前搵到一間平得黎又唔錯既鰻魚舖，地方有點偏遠但喺可以坐巴士喺附近落車行去，有套票既情況下當然唔會錯過，好彩到車駁車話咁快就過到去個邊，只喺仲未夠鐘開市就喺附近既休憩所休息下。夠鐘行番過去時間舖都未開，只喺老闆岩出黎準備開門見我喺附近就問喺咪黎食野，答完係就開門比我入去坐，估唔到老闆都識講句 "無問題"，點左個鰻魚定食食完就坐番車去車站準備出發去今晚既景點。

夜晚既景點就喺岐阜公園隔離既長良川，哩度亦喺日本其中一個可以睇到鵜飼既地方，即喺昔日利用鸕鷀捕魚既傳統捕魚技術。遊客可以選揀比 3400円坐觀光船近距離觀賞捕魚過程，亦可以喺長良川河畔遠距離觀賞，我選了後者，活動大概在七點三就正式開始，開始時先有一段餘興節目，內容是在船上觀看傳統舞蹈，舞蹈接近尾聲會放幾下煙火表示捕魚作業正式開始。當晚有六首漁艇出發，在黑漆漆既環景下有一盞盞既火燈照亮河道真喺好靚，只喺距離頗遠只見到鸕鷀會間中潛入水中，看不到整個捕魚過程，整個捕魚過程大概為時四十五分鐘就結束。期間河川兩旁的旅館亦會配合活動而知暫關燈，真的頗特別既節目。只不過這種作業模式是否虐蓄就喺另一個層面既問題，不在討論當中。

睇完之後就坐車番去休息。

鬧市遊逛 DAY 45

上網見到哩個周末有個叫拉丁美洲節，網上面既廣告當然做到好熱鬧，但喺我就喺度諗究竟哩啲節目會唔會好似啲菲律賓或印尼節喺香港搞一樣，於是我晏晝都出去行下睇下喺點，結果不出所料，望到都唔吸引停低坐係度睇既小圈子活動，始終人在異鄉要搞哩類節慶活動喺好難。於是我都喺附近四圍行，說話我黎度名古屋都成個半月，但喺我一直都未行過哩度既商店街，所以今日順便行下大須商店街。咁岩哩兩日亦喺哩區既音樂祭，每行一段路只要有既小廣場既地方都會見到有人喺度表演中，只喺個人興趣不大都無乜點停低睇，唯獨有個喺三弦既演奏睇左陣，表演者既調皮式演譯方法帶動到台下觀眾一齊拍掌，氣氛不錯。另外喺大須觀音隔離有個幾得意既報時器，每隔兩個鐘會有木偶郁下，咁岩時間差唔多就睇左次。行街睇野始終唔喺我杯茶，兜黎兜去最後都喺兜埋去科學館同附近既公園影花花。之後再望多次個嘉年華活動一樣咁冷清就坐車番去煮餸食飯。

名古屋水族館一天遊 DAY 44

當我決定去水族館時，基本上我已經決定提早結束是次旅程，詳情可以看另一篇文章。

由 Sharehouse 去水族館喺非常近，只要行三個字就到，出發前先上網查下當日既節目行程表，主要都喺睇下幾點有餵魚表演之類。雖然近年有唔少環保人士開始提出一啲人道既說法反對圈養鯨豚，當中亦有部分國家開始推行，在現存最後一批的圈養鯨豚離世後便永久中止相關的部分，只喺個人仍會覺得水族館喺圈養海豚下喺有助推廣大眾對海洋既保育意識，透過睇記錄片同親見目睹始終喺有唔同既感受，假如日後人人改為出海觀鯨豚，某程度亦會做成另一種干擾，感覺上兩者有種莫名其妙既關係，以上純粹一番愚見。

名古屋水族館相比海洋公園裡面既水族館就大同小異，雖然無海洋公園既大魚缸，但同樣有海豚表演，另外仲有殺人鯨同白鯨，當睇到佢地喺自己面前游水就會有少少開心，特別喺見到白鯨喺餵食時段既小表演既樣子真喺好可愛。之後再睇左一個叫沙甸魚風暴，就喺夠鐘餵魚時，佢地追住啲糧粉時好似龍捲風咁，配上背後音樂黎睇喺幾壯麗。

結果一個水族館就行左足足五個鐘多，行完都番去休息。

工作假期個半月後的感想

話咁快喺日本過左大半個月 基本上已經決定放棄喺度搵工 盡曬人事都無乜好結果 只可以話自己準備不足 去日本唔似去其他地方可以用英文就搵到工 放寬名額容易申請唔等如真喺唔洗日文就可以喺當地生活 以個人所見 喺日本生活 n4 喺基本 n5 勉強會搵到工但喺九成都喺做啲唔洗講野既工 如果喺想體驗日本職場文化係可以既 但喺唔好奢望可以改善日文 有咁既諗法一定本身你要識講識聽大部分意思

黎度最大既得著就喺習慣下一個人生活 平時乜都唔洗做而家都要做下家務 特別喺煮餸 我既紙上談兵試煮餸 黎度日本多左好多機會實習 只喺無曬蠔油玫瑰露酒生抽老抽 搞到煮乜都好少落調味 真喺好唔慣啲燒肉汁 去到超市就要諗下乜餸可以點配搭再落鑊炒 廚房無合適鑊蓋又蒸唔到野 得番炆炒煎類可以煮 味噌勉強可以當做麵豉炆野 只喺用赤味噌應該會好味啲

其次就喺 你個人本身既性格唔會因為人在外地而有明顯轉變 雖然我夠膽厚住面皮直接問人地請唔請人 但喺試過幾次都唔會想再試 只好搭單睇下有無著落 但喺眼見而家咁既情況 搵工就更加揀擇 因為知道做啲純粹袋錢而刻板既工根本唔喺自己黎工作假期既目的 哩類工只喺可以幫補一下租金同部分飲食開支 對於日後既觀光開支完全無幫助 基本上打一份工喺儲唔到錢用黎日後遊日用 想觀光都喺燒番自己預先準備既資金

有見及此 我都決定喺哩度留多一段時間去睇埋我想睇既野就執包袱 因為按番日本既出糧文化 打工只喺可以幫你順延返港日期同埋多一個月租金加二個月左右饍食費做資金比你到其他地方觀光 你可以多啲日子選擇 但唔會相差好大 除非等到秋季紅葉或冬季雪景

ps. 工作假期打工有機會被扣 20%外國人身份工作既稅金 但喺哩筆錢因為工作假期身份實質喺唔應該被扣而可以喺申請假向當局申請退稅 而出糧時一般會喺今個月既糧留到下個月20號先出 所以最尾一兩個月就唔好打工喇 唔喺做完收到錢都拎唔到 仲有一個月工作超過40個鐘就會多數被強制繳交一種好似保險或強積金既費用 所以工時長但見到實際收入遠比對方開頭報既價低 按普遍人工時薪850円 - 1100円計算 工時長實收薪金可以先打七折 另外搵派遺公司要好小心 哩個世界奸商無分國藉 不論香港搵定工定喺去到搵都要小心一堆搵笨條款 已知台灣代辦有班人喺專搵人笨 當中以打工換宿類別最搵笨 租屋亦然 小心駛得萬年船

日日如事 DAY 40 - 43

星期日行完伊吹山後就休息下，之後既日子都喺上番日文班就係度做毒男打機過日神，其餘時間就喺度計下數，開始決定之後日子既去向，再次翻看最後一次去 hellowork 時對方提供既洗碗工資料，另外再次翻查 JapanWWOOF 既 hosts 主資料睇下自己應唔應該轉下地方或型式繼續餘下既行程。

登山日 - 伊吹山 DAY 39

在遇上的黃金周情況下，個人真的不想待在家中當宅男，在經過一天的休息後，決定今次試行伊吹山，選這個山的原因是因為看書睇到相關路線覺得有少少似大帽山，路線為沿路來回，而且是附近其中一個比較高的山，有 1300多米，而起步點為200米左右，覺得一次過登千多米是從未試過的事，所以就決定去這。

哩日五點半左右就出門搭火車去近江長岡站轉巴士去登山口，到達登山口同書裡提供既時間相近，先拉幾下筋就喺入口處買入山証，其實哩度可以選擇唔買，只喺哩個費用都喺用黎幫補山上既休息同廁所設施，300円既價錢我覺得無所謂，入山證仲提供左一份大版等高線地圖。售票亭隔離有嗰好似少信箱既箱比登山者填番啲緊急聯絡人資料，以免遇上災難時都可以有記錄得知有幾多人喺山上，只喺我望住堆日本再諗下自己既情況，最後我都喺選擇唔填。

起步初段已經唔想易行，除左大碎石多外，路面亦有一定斜度，基本上全是暗斜，一口氣連續行就到左480米既一合目，喺哩度再拉多次筋舒緩下起步熱身既疲累感。過左哩段就唔再喺林中，之後既路全是開揚，由一合目到三合目再到五合目，路面都唔算難行，斜度適中。只喺開到六合目，大概800米高時，斜度又開增加，路面狀況亦由闊路變成窄路加大量碎石，由於伊吹山喺一個平頂山，所以接近頂部既路都比較斜，登山路都喺以之字型上山，行左一段時間終於到八合目，離目的地既九合目只差200米左右，作一個簡單的休息回氣就繼續向終點出發，黎度哩個位開始見到泥石路不斷有水流落黎，相信喺山頂雪水導致，之後行多陣亦引證左我既睇法，小心咁行過一段又一段既大級石級後就見到圍住山頂鐵網，後尾得知鐵網喺防止比野鹿進入山頂附近食高原植物，行到哩個位啲雪水就更多，部分泥路變成泥漿路，只好行上路邊的草坡避開，見到山頂後再行過一小段雪地路就終於到達伊吹山頂，影番幾張相就即刻去山頂士多食番碗蕎麥麵充飢，點左碗伊吹蕎麥結果又喺全是山菜加兩片魚蛋。

食完野休息左陣就行下山頂小徑，估唔到山頂不斷有近時速既20km/h以上既清勁涼風，雙手由暖都吹到好似放左落冰箱要著衫保暖，喺山頂兜左一個圈就見時間差唔多沿路落山。上山我用左大概三個半鐘，落山我就用左大概個半鐘多，每步都小心行，過左最斜一段既九合目至八合目後就已經好似平時落山咁有少少輕步跑，只喺我都有幾下唔小心跣一跣，只喺問題不大好快平衡番，直接落到一合目先抖一抖，之後趕得切搭兩點半既巴士番火車站。

番到車站見要等火車，再加上時間尚早，我就喺附近行下，得知原來哩度既田野喺其中一個出名睇螢火蟲既地方，見到之後我都打算日後再黎一次，喺附近另一啲位行下再睇螢火蟲。

大概四點之後就坐車番去休息。

參考網址:
https://tozan-guide.com/detail/index.php?id=ibukiyama
http://www.yamaquest.com/detail/ibukiyama-1377/428.html
難度為三星 (五星為最高) 不建議新手試行

是日休息 DAY 38

琴日行完關係，再加上今日天氣報告話有雨，所以都喺休息下，等雨停左就去買餸煮飯，估唔到一包 5KG 既唔洗一個月就差唔食曬，所以今日順便買番包米等個米缸滿。

岩屋堂 元岩巢 DAY 37

休息左一日見好天就決定去行山，之前買左本東海地區既行山書，今日決定跟佢其中一條路線行下，先坐車去尾張瀨戶再轉巴士去品野本町，之後沿左河邊行到尾就到起步既岩屋堂停車場，喺日本行山基本上行正常山徑都會山路清晰，而且指示牌充足，雖然無標距牌，但喺路線清晰下都唔洗擔心行錯路。起步再次比較多梯級，直上一段路之後就到觀景台，喺觀景台上可以望番成個名古屋，大片平原加市中心位一堆高樓。休息片刻就繼續行程，唔洗幾步路就多分岔口，一條上山一條落山，跟書行就喺先上山再原路走番黎哩個位落山，所以都唔洗再揭書就直接上山，行多大概九個字又到上山位，哩個時候決定拎番本書睇下而家大概喺邊個位，因為一陣要原路折返，行多行少都要知道自己位置，由於本書有埋等高線地圖，望到自己已經過左河溪位就知道接近終點，比書裡面既預計時間快，之後行多一個字就見到目到地，書裡面提供既相片就喺坐喺木櫈休息，而我就決定行多幾步上山頂開揚位休息，哩一小段路喺全程唯一既浮砂路，好在斜度唔大又短，行五十步左右就到頂，岩岩個日天朗氣清，望番成個山谷一片新綠真喺好舒服，喺度大休左兩三個字就沿路落山，落山方面就好快，半個鐘已經到分岔口，之後轉彎路去瀨戶大滝，嗰瀑布真喺無乜特別，喺河溪搵左陣都搵唔到想見既蜻蜓就慢慢行番出去入口，估唔到落到瀑布位行出去喺好近，之後喺公園仔休息食飯糰補充一下體力就因番回程車行番出車站，期間見時間多就喺附近既田野影下雀同蝴蝶。

出到車站附近我又早一個站落車，因為尾張瀨戶仲有一個地方我想去，就喺一間鰻魚舖，雖然一碗鰻魚飯唔平，但喺我每次黎日本都想食番一碗，而哩間喺非常出名，被評為全國排名第四既鰻魚舖。預番時間等佢晚市一開就去食，點知可能假日關係，四點去到老闆娘話今日已經賣完無曬貨，結果我喺失望而回，連舖頭招牌都唔記得影就行開左。慢行去車站見哩度喺個陶瓷鎮，昔日都喺燒瓷，可以計劃一下食完早場之後再行下啲歷史徑消磨下。行到車站就坐車番去休息了。

紫藤祭 DAY 36

琴日行完山同睇多次岡崎紫藤後，今日上半晝決定先休息下，只喺到左晏晝又想出去行下就決定睇下名古屋附近最大既紫藤棚，於是坐車去津島天王川公園。點知一個眼花，將特急睇錯做急行，搭錯班飛站既快車，今次真喺我黎度日本之後第一次搭錯車，即刻開 google map 睇下下個站喺邊，睇完之後發現原來再搭多一個站有另一線會兜番去津島，所以唔揀坐回頭車，繼續坐到一宮站轉尾張線，有時坐下慢車其實幾享受，感覺上就好似坐慣公路車時間中坐番轉下路車喺一件好悠閒既事。去到津島市，第一個目的地先去參觀一下津島神社，因為查資料時提及過津島神社同伊勢神宮有少少關係。行完一轉神社就過馬路去隔離既天王川公園，五千平方米既紫藤棚真喺只能用"靚"黎形容，喺哩度行下坐下都想咁快走，最後決定等埋夜燈先走，就喺咁我喺哩個公園可以消磨左接近四個鐘。

郊遊散心 - 王滝溪谷 DAY 35

基本上見工都食白果，所以個人已經無曬意慾再去搵工，再加上由今日開始喺日本黃金周，所以決定出去行下。由於我向來鐘意去郊遊多過行街購物，所以出動既日子集中喺假期，山頭上人多啲比較安全。

坐車去東岡崎再轉巴士就可以去到王滝溪谷路口，沿路直行就見到指示牌可以選揀行下路或上路起步，我揀左下路先行，喺石橋頭附近見到一班鳥攝者，只喺橋柱上亦見到一堆葵花子，相信都喺誘攝的一群，過左石橋就喺妙昌寺，之後沿路再行就有支路上去不動山觀景台，黎度唔差在望下，所以直接行上去，級級樓梯都幾攰下，上到頂亦唔見得景色好，只望到整個山谷，或者秋天有紅葉時會唔錯。沿路落番去大道就經過幾個園地，都喺一啲休憩地方，喺其中一個園地食個飯糰補充一下體力就繼續行，行到王滝橋之後就兜番去石林個邊行埋段奇石徑，哩段路有少少似山澗咁喺大石上走路，路程極短就接番山道，之後就沿路行番出路口。出到路口唔記得翻查回程巴士班次，去到車站先發現原來哩個鐘喺無車，要喺車站多等一個鐘先有，所以決定行多次溪谷入口一帶再出去候車。

番到車站附近，我決定早幾站落車行多次岡崎公園，一來紫藤花吸引，二來日本車費昂貴，順路既話不妨行多陣睇多少少，睇完紫藤花就坐車返去。

王滝溪谷參考網址: http://www.otaki-keikoku.com/pdf/stamp.pdf

再一次失望而回 DAY 34

今天終於等到工場的回覆，意想不到的是對方無講原因就話你唔多適合所以決定唔聘用，結果今日全日都唔多高興，整堂日文堂都心不在焉。放學再去多次 hellowork 亦提供唔到啲好選揀，決定之後既日子都唔會再去，以我既條件多數都喺白行一趟。最後連行超市都睇唔落有乜岩買，都喺番番樓下買料，另外買番包薯片自暴自棄一下，黎到日本咁耐真喺未食過零食，咁既心情下真喺要盡情食番啲垃圾食物。

黎度一個月仲喺乜工都搵唔到，經過多番嘗試都喺食白果，黎度哩刻我都開始考慮清楚未來去向，始終旅費有限，要好好計劃一下，提早返港哩個決定亦再一次重新考慮。

平淡的一天 DAY 33

終於到五月，暫時決定繼續待多一會，只是等了一整天電話都未有消息，唯有再等明天看看結果。

BBQ同樂日 DAY 32

應同屋邀請，今日一行人去BBQ，開頭有啲疑問就喺平時去日文都唔覺有燒烤爐，究竟喺去邊啲地方BBQ，原來目的地就喺公園既大草地，平時假日就有好多日鋪地蓆野餐，而BBQ就喺自備燒烤爐，之後好似網上燒咁用筷子反下啲餸黎燒，大概燒左兩個半鐘大家都開始停手就等個爐熄火執野。燒野食期間，頭頂不斷有毛蟲從天而降，人人有份皆中獎，所以燒到一半都要將啲野食搬位。相比港式BBQ，哩種燒法喺好快但少左燒野食既樂趣，因為一般都喺兩個人負責燒，其他人吹水或者玩，當燒好個時就有人夾埋比你，有啲似頹廢餐，我鐘意燒野所以開頭都主力幫手燒，喺後期要食野同半飽先休息。另外，咁燒法有時唔知大家想食乜餸，有啲一口氣燒多左但無人要就局住繼續燒，搞到燒到燶曬，個人就覺得咁樣有啲嘥。

買錯料之嘥錢無得食 DAY 31

雖然今日主要都喺無所事事，好似平時咁夠鐘買餸煮飯，但喺今日喺超市見無乜餸好買，乜都揀唔落手既情況下見到有啲牛睇落幾新鮮就買黎試下，諗住整蔥爆牛肉就買埋大蔥。點知炒好之後一食，點解咁靭，舊舊都有筋，於是問下人究竟哩舊喺乜肉，竟然就喺牛筋肉，哩啲肉頂多用黎炆，而家炒黎食即喺白整，唯有即刻掉曬落去煲蕃茄牛肉湯，最後啲湯喺唔錯，但牛肉就認真唔好食，仲要有一舊半舊要掉，真喺嘥錢。

岡崎半日遊 DAY 30

唔經唔覺已經黎度日本第三十日，即喺一個月，雖然仲未算喺正式有工，但喺有個九成肯定既答覆都令我對於今次工作假期再次有番信心，可以勉強寄望一下可以挨耐少少，唔洗咁快用盡盤串番香港。有見未來日子將會比較忙碌辛苦，再加上下星期喺日本黃金周，所以決定今日早少少去睇紫藤，避開人群。

坐車去岡崎好方便，跟APP如果唔喺揀東岡崎就會介紹架慢車坐一個鐘，唔跟APP 就可以乜車都上得，去到東岡崎再轉或行路，時間就足足快九個字。時間多既關係，到左岡崎我無直接行去岡崎公園，而喺揀兜路過，路上景點除左寺廟外，仲有一間喺錢幣博物館，裡面主要介紹昔日既日本貨幣。行完之後就直接行去公園，近睇岡崎城真喺無乜特別，所以外圍睇一睇就行紫藤棚。遠看既紫藤喺好靚，好似一串串提子，只喺近睇就唔多吸引，同一般蝶形花科植物既花一樣。喺紫藤下坐底休息一番之後就決定試下去附近既味噌舖睇下，原先以為哩度只喺一間賣味噌既商店，只喺行到附近先知道原來哩度喺味噌廠，入到舖頭仲可以拎飛免費參觀部分廠房，一場黎到當然唔會錯過。參觀頭段都喺講番哩既味噌廠既歷史，個部分地方都喺改建成小型展覽館比大家容易了解番昔日整味噌既過程。後段就喺參觀味噌入藏庫，一個個巨型木桶裡面各裝住六噸重既味噌，何想而之個木桶有幾大。最後，廠方會比大家免費試飲味噌湯同埋用味噌配蒟蒻既小食，而且憑入場票亦可以得到記念品味噌一包，哩個參觀行程可以話喺又食又拎。

行完之後見無乜地方好行就決定早啲番去煮飯。完結今日既行程。

見工日 DAY 29

去日本見工，無論大細公司，尊重場合下我都會著番套西裝。一如以往早到三個以上去視察一下現景同整理一下。結果一入開面見，成個過程基本上無用過我準備定既日文，因為我提到國語嗰時，對方已經搵埋識國語既工友一齊對話，相比之前既見工，今次內容都比較詳盡，或者我撞過板都知道有啲地方需要問清楚，特別喺合約上，唔問一樣講過信字，對於習慣逢重要既野都白紙黑字既我，真喺覺得有少少無保障。點都好喇，聽落就多數都請，只喺留番下星期初再電話正式通知番工日期。希望今次會喺一個新開始，令我對日本既工作文化有番少少好感。

宅 DAY 26

由於見工個度要等到聽日(星期四)，所以今日悠悠閒既情況下，臨尾都上網搵下啲基本日文見工對話同客套說話既講法，做番少少準備。希望到時順利。

再接再勵 DAY 27

經過一輪小打擊之後，要喺日本挨落去只有兩條路，一喺日文突飛猛進可以搵到啲所謂唔洗日文又肯留你既打工換宿，一喺繼續左撲右撲睇下撲唔撲到一職做住頂當。於是今朝再去多次 hellowork，即外國人勞工處度搵工，同上次唔同，今次已有 account 既情況下，唔再喺職員介紹工作比你，而喺拎住幾本求人票睇下有邊啲工自己有興趣再抄底編號等職員再幫你作決定。左揭右揭，幾經辛苦終於搵到幾間算喺岩心水既工，當中有份喺話可以唔洗日本，識國語就得，其他個啲就要日常會話。結果職員睇完一論就話喺聽唔明既情況下，佢地唔會理你識唔識做，所以日常會話水平既你都揀唔到架喇，幫你試下搵個淨講國語個份問下，點知佢打完去問之後就話對方講個人工只喺比一啲識日文既人，唔曉日文人工喺好低，一聽到就諗起上次個單講一套做一套既公司，我當然又翻炒一次呻下。可能今次個職員都喺中國藉，佢見我咁情況就再問下我有無邊啲工種願意做，最後佢介紹左份喺食品工場做既工，因為佢話已經介紹左唔少中國人入去做，可以方便溝通同應付到工作。於是，搵工上又再次有少少曙光。

之後就行下榮地下街，行到夠鐘就上日文班，繼續溫番以前學過既基本日文。

世事難料 DAY 26

今日差唔多成日都喺宅，只喺近旁晚時段收到電郵，打開一看，只能說句 "死得心息。" 話說去 LEGOLAND 見工都一段時間，上星期見無回覆都估到九成落選，估唔到佢地會發正式電郵通知落選者，同香港個種石沉大海有少少唔同。有時啲野就喺心中有數時，再講白啲就喺難受，所以個下心灰意冷。點知轉過頭落樓下煮餸時，坐低停手休息時就收到有信息問到可否用某張相片作宣傳，嗰一剎那真喺覺得總會有曙光，雖然哩類宣傳唔會有任何回報，但喺得到別人既認同已經喺一件唔錯既事。

今日真喺幾分鐘前喺谷底，幾分鐘後就坐過山車沖番出黎。

秘景乎? DAY 25

如果連星期日都做宅男，我就會覺得自己好浪費時間，所以晏晝時段決定出去行下。之前一直都想去下附近既觀鳥中心參觀下，諗唔到仲有邊好去就決定去哩度，由 Sharehouse 出發只要坐一程巴士就到，開頭想慳車費行路去，但係諗到又曬又遠，要行成個鐘都喺比14蚊算。(日本車費真喺幾貴，最低消費 HKD 14蚊起)

坐車期間發生左啲小趣事，原來唔同巴士營運商喺比錢上都有分別，平時坐開既都喺上車拎飛仔到落車先連飛仔一齊比錢，今次哩架就上車比錢，因為無分段制，結果我沖沖忙拎左一千円放落入錢機，但喺個下我以為喺唱錢機，唱好錢之後再入番大餅，點知司機同我雞同鴨講表示入一千円個時已經收左錢，個啲喺找續，比番入多左既錢我。

去到總站穿過住宅區就到海濱公園，見落車個時已經四點，而觀鳥中心會喺四點半關門，所以落車先去參觀，一入公園就發現哩度同之前喺三谷松原一樣，種滿松樹，喺松樹步道底下行真喺幾舒服，入到觀鳥屋見到窗邊擺左唔少單筒望遠鏡比人觀看海提上雀鳥，而且裡面好似教育中心，有唔少雀鳥標本，同時亦有觀鳥屋必備既報告板用作記錄。行完鳥屋就沿海邊行，正向西面關係加上好天，所以我一直慢行等待日落。行到中後段見到一大堆草好似蘆葦叢咁開左花，影左陣相就決定喺度休息下，攤下斜坡上眠一眠，之後差唔多日落就慢慢沿路行番出去，因為日落後會明顯轉涼，唔想冷病一定要睇時間走人。

御宅族的日子 DAY 22-24

這三天都在住宿或附近遊逛，所以不分開記錄了。

DAY 22
經過昨天的挫折後，都在認真考慮將來去向，雖然預算足夠在日一段日子，但是個人不想如毒男般整天埋頭苦幹地打機，所以開始翻聽一下學過的最初級日文，而搵工方面亦先休息一會再找，盡量想會簡單對答後才找工，只是學習進度不理想時一樣會再去 hellowork 再找工作，又或者繼續敲門搵工，始終區內有數間中式餐館。其餘時間就喺打機同埋落下超市買餸。

DAY 23
主要晏晝行去名古屋港遊逛一下，吹下海風，水族館旁原來有個免費的海龜繁殖中心，日後空餘時的確可以走過來散心。另外沿路看看各間餐廳有無請人告示，可惜幾間中式餐館都無告示。

DAY 24
繼續無所事事，超市開門就去睇下有無新鮮貨，第一次見有飛魚賣，喺賣魚雪櫃位左揀右揀，到最後都喺揀左飛魚，番去劏魚煎魚，外觀有啲似鱭魚都擔心肉削唔好味，開頭一煎個時的確啲皮一煎就甩，個鑊又唔夠大又無斬開一半煎，搞到一鑊粥，最後直接喺鑊到拆肉上碟，估唔到味道都唔差，肉質結實，味道甘香，有啲似食紅衫。
黃昏時見天氣唔錯就上天台睇下日落，只喺後期太大風，都喺番入屋廢事吹病。

挫敗感 DAY 21

今日再去多次一蘭見工，希望是但有個洗碗工位，點知個面試官唔識英文，用GOOGLE TRANSLATE 打左句話意思喺 "是次見工只用日語" ，SHOW完就請我走人。哩啲搵工經驗真喺從未試過，原來一個人在異鄉唔識講當地語言喺一件咁痛苦既事，唔喺你有無能力做到份工，而喺你唔曉用當地語言溝通已經不被考慮。如果要我做啲厭惡性行業，自問鐘意整齊乾淨既我真喺接受唔到，不敢喺度諗餘下日子我仲有乜野工可以揀。

最後心情底落去左附近公園行下，一個由明治時期已經存在既燒窰廠活化後既公園，環境幾好只喺無心機行，最後再行一段遠程既路去埋中村公園，睇下個紫藤棚喺點，之後就回程。

曾經仲相信唔曉日文唔會餓得死我，只喺到而家哩刻，發現搵工咁困難，與其臨渴挖井，倒不如早走早著。而家唯有先冷靜下，搵下其他可行方法，無理由一遇到挫折就即刻認輸，咁樣唔喺我做野既作風。

學日文去 DAY 20

唔識日文真喺好難喺日本生存，去旅行仲可以指指點點，會喺長住就要解決收入哩個問題，先決條件就喺要識日文，只喺日常會語咁繁雜，初學者又有幾多用得到，見平平地試下算，如果比錢去語言學校，全日制一個月要十幾廿萬円，我真喺寧願喺香港學左先黎。

上網搵左好多間，最後揀既哩間唔喺收費最平，只喺2000円12堂，純粹地點同時間都比較合適。第一堂都喺學番講早晨個啲，雖然哩啲我喺識，但喺乜都有基本學起，都喺唔好未學行先學走，慢慢循序漸進。

話說日文發音難記時，我會咁樣抄發音。
Eg: ittekima  - 即出門講再見 - 拼音寫法會喺 it - here - key - ma
       itterasshai - 回應 ittekima - 拼音寫法會喺 it - here - la - 嘥

學外語，對我哩個語言白痴真喺好痛苦，仲要喺度挨，都唔知點挨，要玩既玩完，喺時候做番正經野。

上完堂去一蘭公司敲門搵工，點知原來話要打電話，最後講左一論，聽日再見過。

公園遊 DAY 19

昨日太宅的關係，加上先前買定的食材已經吃得七七八八，所以今日一定要去超市入貨。想買平野就要坐車出去，但喺車費亦唔平，所以最好出好行下再順便入貨。搵左啲資料睇下附近有邊地方好去之後，就決定今日集中行公園，揀左三個分佈點都頗遠既公園，原因喺我想買張一日券用，出遠程車感覺上抵啲。

今日第一個目的地喺猪高綠地，豬膏呢，個名幾得意，嚴格黎講哩度似自然教育徑多過公園，行左半個公園，所行既路都喺山路泥路為主，當中有濕地、竹林、田野、林間，生境多樣性豐富，相信踏入初夏時一定生機處處。走完半圈就回程，回程路上發現無用網笠住既垃圾袋原來喺會有烏鴉光顧，篤穿個袋喺度尋野食，難怪沿路既垃圾袋同其他地方唔同，多左個網笠住。之後順便早少少食埋個晏就準備第二站。點知一出餐廳門口唔夠一分鐘就傾盆大雨，行程只好告吹提早去超市入貨。最後特登買左個米缸，因為無飯食既日子好難過，早排喺租屋煮既野食都粉麵類，食完都好似唔飽。

宅 DAY 18

短遊過後休息一下，懶得連 BLOG 也沒有更新，全日只做了基本的家務，其他時間都在打機，算是在日後第一天當宅男。

慕名而來 - 高山祭 & 立山 2017 開山日 DAY 16 - 17

 短線旅行關係，這兩天會一併記錄下來。

一直以來我都想去觀賞高山祭，因為高山祭喺日本三大美祭之一，適逄高山祭跟立山日連埋一齊，喺無得用JR PASS既情況下，有得連住一定一次過去曬，最主要原因喺去立山太遙遠，好難即日來回，點都要喺富山或松本長野住一晚，而高山祭正正可以滿足第一日行程，唔洗直接坐去富山搵野行。

慳錢關係，我再一次搭最早既慢車去高山，五點三就出門去等車，十點到埗。由於高山祭頗出名，遊客量比犬山祭多，中間廣場水泄不通，所以頭兩次納奉環節改去附近食肆用餐同到另一條大街先影屋台列隊，避開人群。有別於犬山祭，同樣的屋台車，這邊氣氛不太熱鬧，屋台車早便泊好在大街上，如展品般供遊人近距離參觀，只要屋台車上雕刻以及用料就有明顯分別，這裡的都是金碧輝煌，在陽光照耀下金閃閃，真的很華麗。

午間時間去看了祭典的巡行部分，巡行中並不包括屋台車，細看介紹才得知只有秋祭才會有屋台巡行，介時會在紅橋上走過。巡行中看到日式的獅子舞，意義應該跟中國舞獅相近，只是模式相差很大。接下來趕回廣場上看最後一場納奉展示。有比較下，同樣的木偶操作，犬山祭的木偶操作技術感覺上比較難，高山祭的木偶只是像會行天橋般在橋頭上做一些基本動作，沒有太多機關裝置。

睇完之後就直接坐車去富山。

第二日一樣好早起身，同樣五點三就去到車站買車飛，由於喺立山今年既開山口，人流都好多，選搭頭班車既情況下，第一班駁車上美女平都要等到八點，足足要等多三班車。要等車關係，到左立山站之後我先喺附近行下，行左陣先去休息室等車，車站愈晏愈多人，見到咁既情況，喺要搭個班車前10分鐘就去排隊，只喺個時已經接近排隊尾，混亂既情況下都唔知有無打尖，最後一開閘就排隊上車，由於前面有唔少人要去放低滑雪裝備，所以上車後有位。上到美女平就轉巴士，本來排喺中間既我見有印台行去蓋印留念，點知行開三步已經要排番隊尾，有啲無奈，啲人都喺爭住排隊鬥快上車咁，好彩最後排喺隊尾既我變左隊頭，上車可以揀頭位坐。巴士哩層就喺主要睇雪谷既一段，去到中段既雪牆已經有八米左右高，只喺架車就到室堂時，開始落住密雪，結果最高一段駛過都睇唔到有幾高。落左車之後亦有告示話天氣惡劣，雪谷大道中止，只可以喺出口附近行下。出去行一行，的確乜都睇到，間中既陣風亦好強勁，強風夾雜雪塊打中塊面都覺得痛，所以喺附近兜在陣就入番室內。一場黎度，有時真喺好想等到天氣好番個時出去親眼睇下19米高既雪谷，只喺望住部電視見黎緊幾個鐘既天氣都唔會有明顯轉變，等左大概一個鐘決定要起程，因為我買既喺單程券直去信濃大町，唔可以喺室堂停太耐。之後既每個中途點都有上觀景台，景色除左白矇矇就無乜特別野睇，特別喺唯一既吊車路段，七分鐘車程，頭六分鐘都喺一片灰矇，點都會有啲失望。最後落到黑部水霸終於可以有多少少景睇，喺哩度大概留左半個鐘多就發現時間差唔多要走，最後如預期般喺兩點半落到信濃大町，之後無野行喺車站食碗麵等車走人。

市內閒逛 DAY 15

轉下眼又加入失業大軍，打算補讀的日語課程要在下星期才開始，無所事事下趁著天朗氣晴外出逛下，看看平時九分鐘車程改成走路的要行多久。最後選了車站附近的景點 - 熱田神宮，最後行了大半個鐘還未到，肚子開始餓時便到附近餐廳醫肚，吃畢再繼續路程，走到白鳥庭園路口，諗左陣都喺決定唔去，之後大概全程行左一個鐘多先到熱田神宮。

入到熱田神宮發現無乜野睇，於是就決定行番去鶴舞公園睇下有無櫻吹雪。結果個段路一樣接近 4-5km，行多一個鐘先到。過左滿開既關係鶴舞公園明顯少左一截賞櫻遊人，只喺依然有人坐草地賞櫻，當我四圍行時，行到櫻花樹下隱約聞到陣陣酸味，相信前幾天人們賞櫻時喝酒喝得醉醺醺獲利回吐所致。雖然間中都有微風吹下一堆櫻花，只是環境一般下，決定提早起程回家。

再接再厲搵工去 DAY 14

點解當初會揀名古屋做落腳點，除左當時機票比去大阪平之外，另一個原因就喺名古屋港區既 LEGOLAND 會喺 1/4 開幕。上星期一搞點在留上開戶上台既工夫之後，番到 sharehouse 第一件事就喺上網申請應徵 LEGOLAND，當時可以揀既見工日子就喺今日。

由於當初一心諗住喺 LEGOLAND 做，所以喺揀 sharehouse 既地點上都有少少近，如果搭地鐵再轉線一定要兜去名古屋，但喺改為行路去中途站既話，行半個鐘再搭兩個字車就到，比轉車既一個車程仲要快，交通費亦慳唔少。

見工關係，今朝早少少出門行過去，結果早左一個鐘就去到，所以喺附近行下，只喺我一直無為意員工入口原來唔喺售票處隔離，當我喺約見時間前三個字動身時發現一直搵唔到入口，最後要由一位職員帶我行大半段路先搵到，最後竟然遲左一分鐘。去到之後主要都喺填番履歷表同埋聽下最基本既部門概要，聽完之後就再接見環節，開門見山我喺唔識日本，因為對方都睇得出，無謂充，所以對方都好快好直接咁講要諗下有咩post岩你做，番去等通知喇。就喺咁，一個極短既會面就決定我之後有無工番喇。

見完工就休息做下宅男。

工作假期 小感想 (一)

時間過得真快 轉下眼就黎兩星期 今朝落住密雨都忍唔住去番既派遣公司直接上門同佢講辭職單野 有人話做酒店清潔不嬲都喺多勞多得 先唔理行情 如果真有其時點解喺登POST個度唔講清楚 反而用另一個好睇得多既說法黎講 咁同違反商品說明有乜分別 就算你話多勞多得 執一張床先得120円 十蚊都無又叫合理? 一句到尾 跟本唔洗為哩啲公司搵藉口將佢美化 刻薄洗死人賺到盡既無良僱主無分國度 純粹睇你遇唔遇上 難得你要打電話搵翻譯 我一樣唔會同你客氣講曬啲問題出黎 唔理你會唔會自己人幫自己人 總之面喺人地比 架喺自己丟 咁既黑工我不知幾想令你係人地勞工處個LIST除名
搵唔搵到工唔喺最重要 有工故然好 可以玩耐啲 只喺我唔認同為左打工而忘記初衷 放棄一啲我想要既野 做一啲唔想做既事 同埋受一啲無謂既氣

辭職去 DAY 13

一個下雨天，真想一直待在 sharehouse 休息，只喺嗰間派遣公司既老闆仲未覆我 email，估到九成佢一喺無睇一喺就唔明唔理，做野向來唔興拖泥帶水，最後落住雨都照出門坐車去公司到直接同個老闆講辭職。

入到去，佢一見到我喺度已經唔多like，之後喺咁雞同鴨講，結果佢打電話去番有翻譯個邊搵嗰度啲人同我傾完再複述一次比佢，當我接過電話就直接開工見山話要 quit 份工，原因喺乜，講左一兩分鐘多啲，老闆已經唔耐煩話要番個電話，咁pass番比佢之後對方都好略略咁講左我喺黎辭職就正式結束哩段有史以黎最落既僱傭關係，嗰老闆塊面黑到呢，好彩佢講番嗰兩日既人工會出番比我，之後乜都唔講就走人。

搞掂之後繼續落住好密雨，行兩行都濕褲濕袋既情況下，都喺坐車番去 sharehouse 。之後搵左一咋學日文既班，諗下有邊啲岩自己。

聽日就去 legoland 見工，開頭諗緊講唔講日文好，只喺講唔夠兩句就乜都唔識，都喺直接用番英文講算，請唔請都無所謂，至少嘗試過。

富士山下 DAY 12

經過琴日既話之後，基本上一直都會查下EMAIL睇下對方覆左未，結果喺 "未" !!!

Anyway，我喺唔會比哩啲壞心情影響太多，於是繼續用埋張青春18券，始終今日喺last day，唔用就變廢紙。

地點方面，本初諗住坐去奈良睇鹿仔，因為我未去過奈良，只喺諗諗下，奈良太近大阪，日後旅行再去都好方便，而且睇番櫻花予想個邊依然開得好少，所以決定改去靜岡県，即刻上網查下靜岡有乜景點，點知發現靜岡有唔少地方都可影到富士山，只喺大部分都集中伊豆半島，車程略遠，只好改搵市中心附近又可以影富士山的地點，最後找了兩個，分別喺薩埵垰同埋三保松原。

按地點位置計劃行程下，第一站會先去薩埵垰，先坐車到興津再行車路前去，路程約一個鐘，行左一大段路終於轉番入步道，只喺個時天氣麻麻，除左煙霞，連富士山都比雲層遮住，名乎其實白行一趟，回程就改去東海道步道，點知落到村就喺咁兜路，啲水牌會點你行條比google map 更長既路，揹住腳架既我已經行到又餓又累，最後要行到車站附近先有便利店買飯團補給。

去完薩埵垰就去三保松原，當時無乜期望，純粹一場黎度點解唔去下，坐一個站 JR 落去清水轉巴士，大概半個鐘車程就到松原路口，入口既神之道已經種滿松樹，入到松原更加多，當中有棵老松叫做羽衣之松，喺啲日本神話相傳羽衣仙女當時喺度下凡過。穿過松林就會到黑沙灘，哩個時候見沙灘上有唔少人都影緊相，即喺話我可以見到富士山喇。果然，皇天不負有心人，晏晝時段雲層開始消散，除左山頂位置間中有薄雲遮擋，基本上可以望到成座富士山。雖然之後既時間都喺望住同樣既景色，天氣亦唔喺非常好，但喺可以見到白雪頂既富嶽我已經心滿意足，哩松原一帶大概行左一個鐘左右就起程回家，始終由靜岡番名古屋接近三個半鐘頭車，唔可以太晏走。

搵老襯!? 走為上策 DAY 11

無良僱主 邊度都有架喇 只喺估唔到我人生第一份遇上無良僱主就喺日本第一份工。

話說請人個封求人信講明工作範疇只喺執拾被舖，薪金喺每小時 850円，點知第二日番工，做到後期竟然要我洗廁所，本身已經唔想做哩樣野，仲要有長工職員同我講，你做埋聽日之後就唔再按時薪計算，而喺段張收拾好既床計算，一聽就知有問題喇，根本唔洗再諗一個鐘要做幾多張床先等如基本時薪。哩樣野個人喺極度反感，第一哩份工無合約，你可以話我蠢無合約都做，但日本人講個信字，只喺估唔到 "信任" 兩個換黎咁既結局，所以撞板唔緊要，最緊要盡早知，之後再打工點都要個間公司出合約，講清楚所以薪酬計算方法、工作範疇等，信張求人信喺多餘。

結果哩日我轉頭就比番個長工自己搞番掂洗廁所既野，之後佢都無野可以比我做叫我走人。只喺我決定唔再做，所以要通知番僱主，偏偏負責人人唔喺度，又咁岩喺星期日公司無開，唯有出封 EMAIL 將我見到既不公平時例曬出黎，講聲 "而家我唔撈呀!!!" 。

一肚氣情況下，唯有先番住房沖番個涼冷靜下，偏偏又要遇上去水位塞左，局住要戴對手套清理埋，認真不爽既一天。最後出街去發掘下啲無乜人提既賞櫻地方，好彩又比我搵到，之後去多次鶴舞公園，目的唔喺賞夜櫻，而喺一直經過都見章魚燒，只喺嫌貴無買黎食，今日太嬲要買番盒化悲憤為食量，享受一下。

錢唔喺咁易賺 DAY 10

喺香港做野都一段時間，但喺外地就第一次，估唔到第一份喺日本既工會喺今日見完第二日就番工。話說本人對日文一曉不通，單純打工是為了維持日常基本開支如租金饍食，同時亦希望在有工作既情況去報讀日文班，不然只有支出而沒有收入既情況下，不用三至四個月就會洗曬是次計劃既預算，而且喺日本讀簡單日文班，不如喺香港打番份人工還可既工，以PART-TIME 型式長時間學習。

先講下今次份工喺乜，哩份算喺我做野以來第一份辛苦工，算喺嬌生慣養既我之前最嘥體力都喺做下SALE行行企企咁過一日，今次只喺短短五個鐘，純粹負責酒店執房，做唔夠兩個鐘已經倦意十足，好在第一日既工作唔需要洗廁所，淨喺換床單。夠鐘放工之後，發現佢哩度喺無話你邊日要番定唔洗番，可能琴日同老闆講左邊個幾日唔得就即喺當其他日子都喺得要番，所以聽日照番。至於人工方面，接近日本既最底工資，只喺咁已經比喺香港既最底工資多大概一倍，但喺出糧方面就唔似香港，香港有法例保障下，僱主需要月尾七日後支符僱員既薪酬，而日本就可以拖到廿幾號，所以我四月份糧有幾多，真喺要到五月中後先知道。而家唯有騎牛搵馬，學好啲日文再搵番好，要我喺日本做執房，乜文都學唔到，夠交租一樣無意思，倒不如番香港打番自己做開既工。而家唯有睇下星期二既legoland既見工如何，希望到時有好消息。

搵工去 DAY 9

連續玩左咁多日，今日決定休息下，留番10/4先用埋最後一日。朝早時段終於有時間去洗番轉衫，只喺洗完發現唔夠衣架，趁未有出聲前用住先，聽日再買多幾隻出去掛。跟住喺電腦前睇下乜工可以搵，同時喺APP度是但申請一份，只喺個時有啲擔心對方全講日文真喺點見工。搵搵下，搵番最多外國人喺日本搵工既主要渠道 - HELLOWORK，上網睇一睇資料，就決定晏晝去試下。

HELLOWORK既中心其實有啲類似勞工處，只不過有翻譯員協助，比曬啲資料比處理求職事務既職員後，佢會跟據你既語文能力搵幾個選擇比你揀。由於我表明完全唔識日本，所以佢話我只有兩個選揀，一份喺酒店執房，一份電話廠房工作。評估完兩份工既人工、地點同番工時間後，我決定試左見酒店先，雖然人工低啲但勝在方便。職員之後就打去同僱主個邊講一陣有人會過黎見工之類既野，比番啲我就叫我一陣去嗰間公司見工。

見仲有一段時間先見工，所以唔搭地鐵慢慢行過去，行到之後仲要等九個字左右，所以先去公園坐下。上到去公司，講左頭幾句我已經感覺對方唔需要我黎見工，而喺直接請我，問左邊啲日子方便番工同埋人工點計之後，就叫我聽日番工，有啲意想不到，而且被派去既酒店亦喺市內一間唔錯既酒店，希望聽日一切順利，可以做番一段時間，幫補之於仲可以安排下非工作時間個陣有無得報番啲日文班學下日文。

寫意鐵道遊 DAY 8

今日繼續四圍走，左諗右諗後，決定都喺唔慳個程私鐵車費，照用PASS坐去靜岡影蒸氣火車。哩條鐵道就喺大井川鐵道，近年佢大搞旅遊生意，喺眾多舊既蒸火車中，將其中幾架改裝成 THOMAS小火車系列，仲會喺每年夏季冬季載客，吸引唔少火車迷專程去一轉。只不過而家四月就未有，淨喺得每日來回各一班既普通蒸汽火車行駛。由於之前旅行坐過SL人吉，發現坐喺車廂內喺無乜特別，感受唔到蒸汽火車行駛時既氣勢，所以一直都想喺火車經過既地方影相。

相比JR，大井川鐵道收費幾貴，如果坐足全程來回要3800円左右，所以計劃行程上，我都喺揀中途站落車影。意想不到既地方喺我打算去既地方而家有特別套票，車費上就無平過，但喺包埋附近溫泉浸浴券一次。去到目的後，第一件事都喺搵位影相，即使喺閒日，黎影火車既人都唔少，大家各佔一方都喺為左影靚相。上網查左時間知道架SL會喺1230經過，所以搵好位之後都要等成半個鐘，影既過程都算快，由橋頭到橋尾，大概50秒左右就行畢。影完之後見差唔多時間會有班普通車經過，於是轉一轉地方影埋先去浸溫泉。

浸溫泉既地方原來喺露天風呂，環境唔錯，只喺前黎泡湯既一般都上左年紀既伯伯，泉水方面真喺幾滑，浸左陣之後就去埋飯堂用饍。只喺食完飯後就發現出現已經落著幾密既雨，附近又無地方可以行，只喺撐住把遮喺河邊行黎行去再番車站等車，大概一共等一個鐘左右就有車搭喇。

回程路途上，頭段都喺要坐JR 普通車，只喺去到大站時發現等多三個字就有班新快速，諗一諗就落車轉車，唔再坐普通車番去名古屋，因為等多三個字既新快速依然可以比普通車快近半個鐘到名古屋呢。就喺咁，我張青春18終於用左四日喇，剩番最後一日可以睇天氣決定幾時用，有需要時可以留番 10/4 最後一日先用。

SL @第一鐵橋

出門不查櫻花予想的後果 DAY 7

第七天行程依舊以青春18券為基礎，本初打算敦賀附近，最後卻選了彥根城，因為早前遊覽犬山城時發現彥根城亦是現存12天守、木製、以及喺國宝級天守閣。由名古屋坐慢車至米原轉車就到，中途都算密，所以今日行程無話特別需要早出門，終於可以訓多一兩個鐘。

去到彥根城，佢提供左四款唔同既入場門券，偏偏無一種喺單入城樓，只好買相對便宜一點那種。城內城外種滿櫻花樹，奈何全是花蕾，唯有當去參觀城樓。入到城門，發現步道都頗斜，參觀完天平櫓就到主城樓。一般黎講，每個天守作用都喺一樣，只喺防禦力就各有分別，到目前為止我正式付費入場參觀過的天守閣只有三個，當中個人認為彥根城喺防禦設計最為出色，哩個亦喺其中一個令佢成為國宝既原因之一。行完城樓就到庭園，景色一般，所以走馬看花式走過一逛就準備回車站去下個景點，豐公園 - 滋賀県的百大賞櫻名所。

豐公園位於長濱市，由彥根坐車一會便到，只是班次比較疏，約半小時一班， 一出長濱車站就會見到長濱城，城樓以下的地區就是豐公園，路程極近，只是問題一樣，所有櫻花樹都是只得花蕾，幸有有少少梅花可以一賞。

以往我去賞櫻都會先查即時的櫻花予想圖，看看什麼地方開得最燦爛，今次本著名古屋、東京、以及大阪也陸續滿開，直覺感認滋賀位罝名古屋與大阪之間一樣開得七七八八，結果喺假設錯誤，近琵琶湖邊的櫻花都未開，反而坐車經過米原一帶時，河道兩旁的櫻花卻盛放中，分別頗大。所以呢，一心想去賞櫻既話，搜集工夫絕對唔可以懶，唔喺隨時摸門釘食白果，好在今日去既地方，就算無櫻花都有其他景點同清閒既環壞休息，頗寫意。

彥根城

長濱城

走進秘境 DAY 6

由於要忙既事已經處理，所以要搵啲地方善用一下張青春18。揀地方上，一般可以喺地圖上以名古屋為中心畫一個圓圈，圓圈直徑為一般慢車由名古屋出發需時三小時既地方。點解要咁做，因為太近(即一小時多車程)既地方車費一般都喺1000円多，來回車費同正價差唔多，唔會因為使用青春18而省錢，單純方便左，所以一般想善用青春18券，可行方法有穿州過省跨県由南去北，中途揀民宿住，另一種就計岩時間即日來回而車費以4000円起計。只不過有時唔可以咁市儈，為左賺盡而去一啲唔吸引既地方，反而會變左有啲本末倒置。

於是，今日揀左有好多秘境車站既飯田線，當中特別揀左小和田落車行下，小和田喺日本當地被評為秘境車站第三位，車站除保留舊有既木製車站外，同時車站接近三県邊界。出發前，查APP 突話趕唔切班車，嚇得我即刻諗其他可行方案，之後再查清楚，發現轉另一個方法查，我喺有足夠時間轉車，即時放鬆番。

到達之後，落車既人連埋我先得三個，比想像中仲要少人。車站景點差唔多一眼睇曬，落車就見到三県方向既指示板，同時車站亦叫做恋成就站，之後就到舊式車站候車室同恋之涼亭櫈。由於下班車要兩個鐘後先到，要再消磨時間只有沿步道走，問題喺兩個景點中一個要行一小時，一個行五個字，如果行遠程會隨時趕唔切車，所以只好行到第一個景點就回頭。步道前段貼近河邊，景色怡人，難怪當地評分中欄中既秘景度咁高分。之後既路段只喺我一個人繼續行，過左一段因山泥改道既路後，終於行到吊橋前，走在吊橋上，到中段會有少少搖，加上欄杆矮，吊橋底又喺普通鐵網式鐵板，我完全唔敢向下望。來回前過兩次就原來折返。

返到車站就搭多一個車站到第二個排名十四既中井侍，相比小和田站，哩站明顯遜色，完全無秘境味道，單純難以透過其他抵達而排名高。夾岩時間關係，喺車站等多兩個字就有回程車番番去名古屋，就喺咁，一日既行程又結束喇。

忙碌的一天 DAY 5

第五日

由於上星期未能即時入住，要處理的瑣事只好等這天繼續處理。之前揀好單位關係，今日只喺一早約租房公司簽約同入伙，為左可以一日之內搞好曬啲野，所以之前約左最早對方可以既時間，十點就喺 SHAREHOUSE 內簽約。簽約都喺好基本個啲內容，集中講有乜唔做得，點樣中止合約之類，大致無問題就簽，本來話會講清楚邊啲喺公家野同私家野，後尾講講下都無左回事。只不過哩啲可以事後問下同房既，所以整好曬之後就坐一個站地鐵去市役所更新在留卡資料。
市役所裡面基本上主要職員都喺講日文，懶得問既情況下，睇下水牌就見到要去邊條龍等，拎完籌就睇下喺咪有野要填，之後喺填FORM表度見到有份應該喺我今次要用既文件，只喺一開始傻傻下諗都唔諗就填，結果頭三份都喺放落垃圾筒，第四份先填岩，填到一半見有個好似識外語既職員問下，指示下就填埋剩底既地方，過左陣都排到我，去到櫃位就黎度雞同鴨講既事間，哩個時候當然拎支筆出黎寫，因為日式英語發音喺同慣常發音有啲分別，喺估到佢講邊個英文就寫出黎問下有無聽錯，跟住大概喺櫃位搞左一個字左右就再拎籌等拎結果。登記在留卡一般都會叫你申請埋當地既國民保，因為哩個喺佢地既慣常做法，只喺如果出發前喺香港買個份工作假期保險有包既話，其實喺可以買，問題係有啲日本人做野好執著，一定要你買，好在今次我遇到既就好通容，見佢想講 Insurance ，我就用身體語言SAY NO，咁就過度關。人多關係，等拎卡個度等左好耐，最後由入去市役所開始計時，大概坐左個半鐘先走。搞點之後就落名古屋站既銀行開戶口。

喺日本開銀行戶口同上台用電話喺一個幾矛盾既關係，一個唔好彩就會出現不斷循環既局面。話說日本銀行需要有電話號碼先可以開戶，而電訊公司就需要有銀行戶口先可以出電話號碼，試問一個乜都無既外國人士又點會一到埗就有其中一樣呢。只不過，近年多左外藉人士在日工作或留學，有啲公司已經無咁執著，只喺有啲員工會依然執著落去。

話說我去開戶個間銀行喺網上留言中都話算喺幾易開戶既一間，可以無電話號碼都開到，偏偏我去開戶時，個位職員點都唔肯，話公司政策唔比，結果我費盡口舌都唔肯，只好先去搞電話號碼搏一搏。入到BIG CAM 哩面有好多間電話供應商既資訊，只喺睇左陣都唔知揀乜好，咁岩有人埋黎問下有乜幫到你，咁我就解釋左我既狀況之後，佢介紹左一隻可以岩我用既計劃，本初好地地，只喺原來日本開新號碼要比一個類似設立費既費用，而哩個費用佢之前一值無提，所以我即時問佢哩個費用會唔會去其後月費回扣番，偏偏佢又話無，由於佢一開始無提及哩舊錢，而價錢接近月費既一倍，有啲好似比人呃咁，當然好不滿，結果有個懂國語既職員過黎幫手，我即時用上我暫時最流利既一次國語對話表達不滿，聽完解釋只好接受，同本身個職員講聲抱歉，點知佢整好之後話 "而家公司有特價，你既3GB PLAN 會自動升級做4GB PLAN ，同時第一個月免月費，第二第三個月會有金額扣除可以比少啲月費，我聽完之後有少少無奈，如果佢一開始講左咪唔會誤會。點都好，最好都算順利拎到個電話號碼可以去番銀行開戶。齊料關係，銀行開戶真喺好快，而且即時出埋提款卡。就喺咁，到埗初期要處理既野就搞掂曬，之後幾日都會用埋張青春18 ，因為10號到期，加上本周後期有雨，都喺盡早用左好啲。

熱血第一擊 青春18 DAY 4

2/4 第四日 星期日

以工作假期簽証方式到日本觀光，其中一個最大既問題就喺要對當地昂貴既地費，一般以旅遊簽証觀光喺可以買各式各樣既鐵道 PASS ，善用既話可以節省大筆車費開支同搭車時間，只喺而家我喺唔可以買哩類 PASS，唯有改用一種名為 青春18 的乘車券。

青春18 完全無年齡使用限制，單純比 11850円後，你可以喺嗰季期間內揀五日，而使用當日可無限次任搭 JR 普通車。重點喺普通車，即喺唔洗查票個類，只要列車喺特急類別就要比足全費，唔可以補特急券。簡單黎講就喺局住閒式遊，要你站站停享受下坐車既樂趣，基本上一個鐘頭既車程都喺唔會點回到本，計埋來回都喺只喺岩岩打和，想活用張青春18，就需要一份熱血 - 早起身，選揀一啲偏遠而車程最少三個鐘以上，其本上咁搭一定有賺。

於是，我第一日既行程就揀左飛驒古川，原因就喺近期比較出名，自從你的名字上畫後，之後陸續有介紹哩度喺作者取材既地方，所以唔少人慕名過黎走番一下戲中主角所走過既路 (即喺打卡) 。套戲我就未睇過，亦唔喺為左打卡，只喺高山幾年前去過，個時無時間去哩度遊逛，所以今次要補番。由名古屋出發去飛驒古川純粹車程耐，轉車次數唔多，只喺坐一坐就要坐四個半鐘先到，足足比特急坐多兩個鐘。查APP得知最早一班車喺 0600 由金山出發，1045 就會到目的地，所以我五點九左右就要出門。

去到飛驒古川，第一件應該要做既喺去隔離新個條橋影番去車站，因為班車好快就會駛出，想打卡影到個一幕既話，走左一班車就等一個鐘左右先有下班。影完相之後基本上就喺自由活動時間，因為古川相比高山，整體感覺相差幾大，街道明顯冷清寧靜，相比高山老街人山人海，喺差天共地。打完卡，一般市內觀光都會介紹去白牆屋影下屋前明渠有好多大鯉魚，之後就喺參觀一啲展館，如果唔想一樣就可以行反方向，繼續尋覓你的名字戲中出現過寺院階梯。唔喺打卡關係，所以我只喺揀普通市內景點，要行其實好快行完，唔參觀既話，一般步速相信可以一個鐘左右行完，問題喺回程既慢車一喺揀搭 1205 一喺就 1459 或更後班次，如果揀第一班就可能會未行完就要趕番去車站，揀第二班就要諗辦法消磨多兩個鐘。最後我喺揀左後者，喺附近行下公園散下步，等搭1459班車，只喺哩班車去到高山就停，要由高山坐車番去要等到1638先有，所以去古川都一樣有時間行一趙高山。

第一次用青春18，整體感覺還可以，站站停有時好難喺車上休息，所以唔好奢望早起身既問題可以坐車訓番補數，另外就喺 JR 啲座位會發熱，有時坐得耐會過熱，比較唔舒服。

終於完左今個週末，聽日正式處理一下抵步後要處理既瑣事。

感受當地節慶 Day 3

連續兩日太攰無更新 唯有後補一下

先前搵資料發現每年四月第一個星期六、日都喺犬山祭，岩岩好今年既第一個星期六就喺四月一日，由名古屋去犬山都算近，所以一早決定到步後就會去見識一下。

先略略介紹犬山祭，犬山祭都喺一個以屋台為核心為祭典，區內各町既屋台會陸續巡行到犬山城下既針綱神社納奉，主要一個納奉環節就喺第三層既屋台會揭幕並由操作人員控制器該層既木偶機關進行一啲神話故事表演。祭典由九點開始，午間時段喺納奉時段同按組別部分巡行大街一次，到了晚上則會掛上燈籠，可算是一個全日型式既祭典。

當日早左起身關係，八點已經坐車到達犬山，早到關係都喺附近遊逛休息，當祭典正式開始時，主要都喺企喺轉角位睇，台車車輪以實木跟鐵架所組成，大車輪要轉90度彎是有困難，所以祭典中其中一個吸引遊人注意的地方就是看著人們怎樣合力把大型既屋台轉向。

由於嘗未集合完的時間頗悶，每架也不相伯仲，所以轉逛一轉犬山城。犬山城是目前其中一座完好無缺的天守閣，同時亦是全木制，內進需要脫靴。城內既梯級頗筆直，單向順序參觀，上了五層便到頂層，意想不到的是頂層的觀景台並非在牆內而是在牆外，沿著牆外既圍著欄杆既窄道飽覽整個犬山地區以及木曾川。

走完犬山城後，所有屋台車終於全集結在廣場前，納奉環節亦隨即開始，這些木偶機關極多，納奉完畢後便會離開廣場經大街巡行至車站前，當中有最後七架會留在廣場待至傍晚的點燈環節。納奉期間，我先後看了其中七架既木偶操作表演，其他時間就回大街上拍照。當中留意到有架屋台車一直有當地有名既電視台等待拍攝操作過程，我當然也不會錯過，的確那部台車是眾多中，感覺操作是最複雜，木偶竟可以走梅花椿。

看畢納奉後，還有近兩小時才到點燈環節，於是我走到附近既木曾川散步，其中一條橫跨木曾川大橋正是水霸的閘口，經過排水口那段時，會覺得天橋有點震，而且在大橋回看犬山城又有另一番景像。

當返會廣場前時，屋台已經掛了九成燈籠，點燈環節也緊隨開始，想不到燈籠是逐盞用火槍點亮，唔知舊時未有火槍會用咩點燈呢。當全部燈籠都亮起時，畫面的確幾靚。全亮後若兩個字左右，屋台又再次出發，陸續離開廣場返回町內。看了一段時間後，我亦回家去了。想不到我在犬山待了十二個小時呢。

天氣不似如期? DAY 2

今日節目本來安排到密麻麻，估唔到最後竟然喺份外清閒。加上朝早仲有陽光，只喺未到晏晝就開始落雨落到無停過。

話說參與工作期假中有一系列喺初到埗時必須處理既事，分別喺租房、更新在留卡資料、開銀行戶口、買SIM卡上台。次序基本上無得改變，所以我既第一步就喺搵屋，一般黎講都會出發前搵定，純粹喺出發前網上比定首期訂金定去到睇樓再即時落訂，今次我揀既後者。

我第二日既行程就喺先處理哩埋瑣事，先前約左租屋公司睇樓，諗住搞掂之後直落隔離區役所整在留卡，再去埋名古屋站整銀行戶口同上台，有咁多野要做既情況下，我直接買訂張一日地鐵券，準備到時不停轉車。睇樓過程都算順暢，有個四個單位比我選揀，其中兩間間格一樣，只喺睇完之後，都唔可以話多選揀，同間格有個大斜角位，個人唔多鐘意一開始已經BAN，另外兩間一間大概喺1:5既長方型一間近2:3 既長方型，論間格其實會比較鐘意後者，只喺睇番個單位面積喺比另一間細，而且有個比較麻煩既問題，因為幢樓對正消防局，而哩個單位喺對正，長型啲個間反而喺距離最遠，所以最後喺揀長型個間。只喺問題又黎，因為本身喺酒店住緊，無理由乜都未搬過去就照比租金佢，有得揀入伙日當然揀下星期一，結果就喺因入伙日喺下星期一，變左今日唔可以去市役所整在留卡，其他既瑣事都要擱置一下，只好搵其他地方逛。

方便起見，首先就先返酒店再收拾一下行裝，換番啲影相裝備，整理完畢就決定去視察一下名古屋附近兩個百大賞櫻名所，分別喺鶴舞公園同長崎川河畔。雖然今年櫻花比往年遲開，只喺第一站既鶴舞公園入口櫻林已經有部分開左，櫻花樹下亦有一兩塊地席，看來這種細雨不會影響日本人對賞櫻既雅興。在公園逛了一圈後便再轉地鐵去長崎川，這個賞櫻地點離地鐵站有一段距離，走了大概兩個字多終於到處河邊，雖然河道兩旁都是櫻花樹，只是大部分櫻花都未開，在附近兜一兜圈時發現有個地方叫東山莊，順道逛一圈便沿路折返，先回酒店休息。

休息期間得知有類似IKEA既大型傢品店可以買得到枕頭，於是喺傍晚再次外出一下，拎住一日券坐四個字地鐵去買枕頭加用饍就結束今日行桯。點解要買枕頭，因為租房公司個度唔包，如果包寢具要另比一萬円，只喺我本身已經帶床單，只欠枕頭，當然自行解決比較化算。

攝於鶴舞公園

旅程正式開始 DAY 1

一個充滿挑戰及變數的旅程正式開始。從今日開始，我會盡量將每日既所見所聞記錄下來。由於本人不善於以書面語寫作，所以有時會以口語化方式直接表達出來。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

話說今日行程好簡單，就喺坐飛機過日本，一切關於工作期假既事都唔需要理會，留番第二日先開始處理。只喺咁簡單既計劃都突然出現變數，原先 1205 離港既航班先因為登機位置需要另乘接駁車導致登機延誤，其後航班如常在跑道等待起飛，點知班機轉入直路時唔喺向左準備起飛，而喺轉右再轉入貨機跑道，喺個一剎那我就知道班機有問題需要折返停機坪，結果一分鐘唔駛就有機倉廣播表示航班有機件或者出現故障需要檢查一下。番到停機坪後得知冷氣系統出現小故障會派人搶修，搶修後可如期出發。最後等大概十五分鐘後就有結果，表示航機既問題已處理好，可以如常出發，結果航機大概兩點先離港，比預期遲左一個鐘多先到日本。等既期間，由於我原先安排左第二日早上去同租房公司會面睇樓，本初擔心航機問題嚴重未能及時處理而無法即日到埗，只好即時發電郵知會對方，好在最後問題好快處理好，確認時間如常便可。俗語有話，塞翁失馬，焉知非禍，遲左一個鐘出發既航班，換黎可以機上睇一陣日落，都算唔錯。

落機之後就入境，由於我喺飛去名古屋，拎住工作假期簽証喺唔洗特別排另一條隊，關員可以即時出在留卡，只喺整在留卡需時，排我後面既局住要比其他人等多一陣，大概處理一個字就辦好，對比其他日本地方既關員，哩度算做得幾快。過左關之後就一眼見到行李岩岩喺輸送帶轉出黎，順手拎埋就過埋海關就正式入境。工作假期關係，洗費當然慳得就慳，坐名鐵落酒店唔揀機場快線，轉搭特急普通車，咁就可以慳番特急費，到埗時亦唔喺差好多，只喺慢四個字，可以接受。

番到酒店執拾一下就望聽日一切順利喇。好彩既話，聽日應該幾忙。

PS. 今季既 青春18 券喺 31/3 就停售，使用期至 10/4 。撞正頭兩星期喺櫻花期，所以一開始計劃哩段時間唔會搵工做野，好好享受哩個假期再工作，喺 WH 簽証買唔到一般觀光PASS 既情況下，青春18 算喺一種較抵既到近郊觀光券。

未出發先撞板

隔離出發日期只餘下數天多，可是在收拾行季其間，發現了一個令人晴天霹靂的問題，不知何解點初在選擇行李託運上只選了 20kg，一般參加工作假期的都會選 30kg 。殊不知航空公司也改了行李託運的政府，不可在購買後再在任何更改，只可以當天在櫃檯前按超重的重量另補附加費，現只好把行李重量控制在25kg內，額外支付 $200 去解決問題。假若超重至26-30kg，附加費將會為$400，相比當初購買的價價貴$250。

如此同時，我也開始查看抵埗後的市役所、銀行、電訊公司等地址，結果一看發現頗難一天內完成申請各個手續，看來弄這些要弄幾天。奈何我打算利用青春18先到附近觀光一下，而這季的套票可使用的日期將於10/4 結束，時間分配上便變得頗緊迫。

希望到時一切順利，事事暢順。

觀鳥，鳥攝

換了相機後，可以拍攝的題材又多了一種，在長焦距下，平日只能遠看的雀鳥終於可以拍得到了。只是粗心大意的我在拍攝過程總會看不到躲在附近的雀鳥，多走兩步便會見到牠們飛出來轉到別的位置覓食。

棕背伯勞

黑喉石䳭

斑文鳥

扇尾沙錐

準備出發~

正所謂 【人不輕狂枉少年】，挨過了半工讀的辛苦日子後，一直都想衝出自己的安全區去外面的世界闖一下，早前難得申請工作假期成功，於是最終決定挑戰一下自我能力，就算對日文一曉不通亦決定拿簽証，嘗試到日本工作假期，看看自己能否融入當地的生活，繼而尋找一條屬於自己的道路。

出發前，有不少事前功夫要準備，當中包括最基本的購買相關的保險、機票、當地住宿安排、資金準備及當地通訊安排等。隨著出發日期快將來臨，懶懶閒的我也開始要執拾行裝，同時搜集一些在落腳點附近的景點，好讓我在找不到工作的情況下也不用浪費太多光陰白白地渡過每一天。

心底話︰日文雖然是當地主要語言，英語在當地並不是人人也曉，只是不會日文的我仍相信自己可以排除困難，利用有限的身語言及簡單用語可以應付得到最基本的生活。有時會想，為何外藉人士一樣不會日文不會漢字也能在當地自遊行或工作假期，為何作為一個香港人卻一定要跟隨主流一定要考獲一些日文的認證才算有能力前往當地工作假期。語言只是方便溝通，並不代表不能溝通。